Ermənistanın Dilican (Tavuş) vilayətinin qubernatoru Hayk Qalumyan Azərbaycanla həmsərhəd rayonlardan əhalinin təxliyyəsi ilə bağlı planın yeni redaksiyasının hazırlanması barədə sərəncam imzalayıb.

“news.am”ın yaydığı xəbərə görə, sənəddə bu rayonlar “yaşayış üçün təhlükəli” adlandırılıb. Sənədə görə, əhalinin həmsərhəd zonadan 10 kilometr aralıya, ölkənin iç bölgəsinə təxliyəsi nəzərdə tutulur. Bəhs edilən sənəd avqustun 19-da imzalanıb.

Sənədə edilən əlavələr və dəyişikliklərdə Dilican rayonunun Azərbaycanla həmsərhəd kəndlərindən təxliyə edilərək köçürüləcək erməni sakinlərin sayı, onların yaş bölgüsü, Tibbi dəstək qüvvələrinin hesablanması, yenidən yerləşdirilmə məkanları, müvəqqəti ərzaq təminatı, geyim, alt paltarı və ayaqqabılar verilməsi, Dilican bölgəsinin əhalisinin hesablanması, habelə bu şəxslərin qəbul məntəqələrinin yaradılması, sonradan Dilicanda müvəqqəti və ya daimi yaşayış yerlərinin müəyyənləşdirilməsi kimi məqamlar qeyd olunub./konkret.az