Bakı şəhəri 189 nömrəli tam orta məktəbdən şagirdin döyülməsi xəbəri təsdiqlənib.

Məktəbdən mediaya bildirilib ki, Bakı Şəhər Təhsil İdarəsi (BŞTİ) tərəfindən məlumat veriləcək.

Daxili İşlər Nazirliyin (DİN) Mətbuat Xidmətindən isə sorğuya cavab olaraq bildirilib ki, məsələ ilə bağlı araşdırma aparılır:

“Sosial şəbəkədə yayılan görüntülərdən məlumatlıyıq. Aidiyyəti üzrə müvafiq polis bölməsində araşdırma aparılır. Araşdırmanın nəticəsindən asılı olaraq əmələ hüquqi qiymət veriləcək”.

Məsələ ilə bağlı Bakı Şəhəri üzrə Təhsil İdarəsinə (BŞTİ) sorğu ünvanlamışıq.

Bakı Şəhəri üzrə Təhsil İdarəsindən verilən məlumata görə, iyunun 7-də məktəbin texniki işçisi ilə IX sinif şagirdi arasında baş verən insidentlə bağlı araşdırma aparılıb:

“Araşdırma zamanı məlum olub ki, dərsdən sonra texniki işçi bir şagirdin (müvafiq səbəbdən şagirdin adı qeyd olunmur) pəncərədən məktəbin arxa həyətinə düşdüyünü görüb. Yaxınlaşaraq şagirdə irad bildirib və məktəb rəhbərliyinin yanına dəvət edib. Bu zaman aralarında anlaşılmazlıq və insident yaşanıb. Məktəb rəhbərliyi tərəfindən şagirdin valideynləri məktəbə dəvət edilib. Məsələ ilə bağlı hüquq-mühafizə orqanlarına müraciət olunub. Texniki işçinin izahatı alınıb, bu kimi halların yolverilməz olduğu bildirilib və o, işdən azad olunub”.

Qeyd edək ki, Bakının Səbail rayonunda 189 nömrəli tam orta məktəbdə yaşanan insidenti ilk olaraq unikal.org xəbər portalı yayıb.

Baş verən hadisənin görüntülərini təqdim edirik: