Rusiya Silahlı Qüvvələrinin Xarkov vilayətinin Çuqev şəhəri yaxınlığındakı hədəflərə endirdiyi zərbələr nəticəsində azı yüz silahlı öldürülüb.

Bu barədə Ukrayna Teleqram kanalları məlumat yayıb.

İddiaya görə, Ukrayna Hərbi Kəşfiyyat İdarəsinin rəisi Kirill Budanov dağıdılmış poliqonda ola bilər.

Zərbə aprelin 15-də “İsgəndər” raketləri ilə endirilib. Rusiyayönlü KİV hərbi obyektin ərazisində irimiqyaslı yanğınlar, eləcə də təcili yardım maşınlarının karvanları barədə məlumat verib. Yerli hakimiyyət sakinləri qan verməyə çağırıb.

“Military Affairs” xəbər verir ki, Çuqev bölgəsində “çox vacib bir şəxsin” vurulması ilə əlaqədar Ukrayna Teleqram kanallarında çaxnaşma yaranıb. Budanovun, eləcə də Ukrayna Silahlı Qüvvələrinin digər yüksək rütbəli zabitlərinin öldüyü iddia edilir. Bəzi kanallar xəbər verir ki, ölən Budanov deyil, Ukrayna Silahlı Qüvvələrinin baş komandanı Aleksandr Sırskidir. Hələlik bu məlumatın rəsmi təsdiqi yoxdur.