Rusiya 2022-ci ilin 24 fevralından bəri Ukraynanın 62 min kv.km-dən çox ərazisini işğal edib.

Bu barədə Ukraynanın “DeepState” Teleqram kanalının hesabatında qeyd olunub.

Hərbi əməliyyatların ilk həftəsində Rusiya Ukraynanın Kiyev, Çerniqov, Sum, Xarkov, Zaporojye, Xerson, Donetsk və Luqansk (bu iki vilayətin ərazisinin bir hissəsi 2014-cü ildə işğal olunmuşdu – red.) vilayətlərinin bir hissəsini işğal etmişdi.

Lakin 2022-ci ilin martın sonu-aprelin əvvəllərində rus ordusu işğal etdiyi Kiyev, Çerniqov və Sum vilayətlərinin ərazisindən çıxmağa məcbur oldu.

Sentyabrın 6-da isə Ukrayna ordusunun başlatdığı əks-hücum əməliyyatları nəticəsində Xarkov vilayətinin də işğal olunmuş əraziləri ruslardan təmizləndi. 6 sentyabr-10 oktyabr əməliyyatları nəticəsində Ukrayna Xarkov istiqamətindəki dövlət sərhədini bərpa etdi. Bundan başqa, Donetsk və Luqansk vilayətlərinin işğal altında olan bəzi əraziləri də azad edildi.

Ukrayna Silahlı Qüvvələrinin avqustun 29-da Xerson istiqamətində başladığı əks-hücum əməliyyatları noyabrın 11-də rus ordusunun Xerson şəhərindən çıxması ilə başa çatdı. Bu əməliyyat nəticəsində Rusiya ordusu Dnepr çayının sağ sahilindən çıxmağa məcbur oldu.

Ukrayna ordusunun 2023-cü ilin iyununda Zaporojye istiqamətində başlatdığı əks-hücum əməliyyatı isə uğursuzluqla nəticələndi. Ukraynalılar rusların “Surovikin xətti” adlandırdıqları müdafiə xəttini tam yara bilmədilər. Nəticədə Ukrayna ordusu yalnız bir neçə yüz kv.km ərazini azad edə bildi.

Hazırda isə Rusiya ordusu hücumdadır və ən son Avdeyevka şəhərini işğal edib.