Ermənistanda anti-Rusiya ritorikası artmaqdadır. Təkcə media və siyasi dairələrində deyil, rəsmilərin də dilindən Rusiyaya yönəlik bəyanatlar səngimək bilmir. Bu ölkənin Təhlükəsizlik Şurasının katibi Armen Qriqoryan “Novaya qazeta Europe” nəşrinə müsahibəsində xarici siyasət, xüsusən də Rusiya ilə münasibətləri barədə qalmaqallı fikirlər bölüşüb. Jurnalist Yan Şenkmanla söhbət zamanı o, Ermənistanın Şərqlə Qərb arasında “qəribə rəqsləri”nin nə ilə əlaqəli olduğu sualını cavablandırıb.

“Burada qəribə heç nə yoxdur. Son illər dünyada və xüsusən də regionumuzda təhlükəsizlik arxitekturası kəskin şəkildə dəyişib. Əvvəllər hər şey aydın və anlaşılan idi. Şərti olaraq deyək, düşündük ki, telefonla zəng edib: “Mənim problemim var” demək olar. Cavabında deyəcəklər: “Yaxşı, əzizim, kömək edəcəyik”. Cəhd etdik və görürük ki, bu mexanizm işləmir. Müqavilə öhdəliklərinə əməl edilmir. Bütün təhlükəsizlik konsepsiyamız bunun üzərində qurulub, lakin hələ yenisi yoxdur. Ermənistanın təhlükəsizliyini təmin etməli olan mexanizmlər iflasa uğradı, yeniləri yaradılmadı. Bu böhrandır”, – Qriqoryan bildirib. Onun fikrincə, bu halda yeni mexanizmlər və silah təchizatı lazımdır, çünki “obyektiv olaraq biz Rusiyaya sifariş verdiyimiz və ödədiyimizi almırıq”. Onun sözlərinə görə, söhbət bir neçə müqavilədən gedir, o, tək deyil. “Və biz KTMT-dən də onun keçən ilin sentyabrında Azərbaycanın Ermənistan ərazisinə birbaşa təcavüzü zamanı işləyəcəyini gözləyirdik. Bu alınmadı, vəssalam”, – Qriqoryan bildirib. O, KTMT-dən çıxmaqla bağlı müzakirələrin getdiyini də etiraf edib və bunu “təbii reaksiya” adlandırıb.

Təhlükəsizlik Şurasının katibi jurnalistin “deyəsən, Rusiyadan başqa bir şəxslə münasibət qurduğunuza görə cəzalandırılırsınız” fikrinə də münasibət bildirib. “Bəzi mənada haqlısan, bəzi cəhətdən haqlı deyilsən. Atışma və təxribatlar təkcə Qərblə danışıqlar apararkən baş vermir. 2018-ci ildə Ermənistanda inqilab baş verəndə demişdik ki, bu, daxili demokratik prosesdir, xarici siyasətə təsir etməyəcək. Və biz Rusiya ilə işləməyə davam etdik, lakin bu, bizə təhlükəsizliyə zəmanət vermədi: 2020-ci il müharibəsini aldıq. Başqa bir misal. 2013-cü ildə prezident Serj Sarkisyan sonradan Aİİ kimi tanınan Gömrük İttifaqına daxil olmaq qərarına gəlib. Ona başa salıblar ki, bunu etməsə, Dağlıq Qarabağda problemlər yaranacaq. Sarkisyan üçün İttifaqa daxil olmaq üçün əsas arqument Qarabağın təhlükəsizliyi idi. Bundan sonra iki müharibəmiz oldu. 2016-cı ilin apreli və 2020-ci ilin sentyabrı” deyib./milli.az