Avropa dövlətləri ABŞ-da keçiriləcək aralıq seçkilərdə Respublikaçılar Partiyasının qalib gələcəyi təqdirdə Vladimir Putinə güzəştə gediləcəyindən narahatdırlar. Onlar hesab edirlər ki, bu baş verərsə Qərb ölkələrinin vahid cəbhəsi dağıla bilər.

Bu barədə “Vaşinqton Post” qəzeti yazır.

Nümayəndələr Palatasında azlıqda olan Respublikaçıların lideri Kevin Makkartinin qalib gəldikdən sonra Ukraynaya “boş çek” ayırmağa davam etməyəcəyi ilə bağlı açıqlamasından sonra həm Kiyev, həm də Qərbi Avropa rəsmiləri Ukraynanın ABŞ-a arxayın olub-olmayacağı ilə maraqlanmağa başlayıblar.

Nəşr qeyd edir ki, Respublikaçıların Nümayəndələr Palatasında səs çoxluğu qazanacaqları təqdirdə Ukraynaya maliyyəni kəsmək təhdidinə əməl edib-etməyəcəyi hələlik bəlli deyil.

Başqa bir respublikaçı senator Mitç Makkonell bildirib ki, Senatdakı respublikaçı çoxluq öz nəzarətini lazımi silahların vaxtında çatdırılmasına və Ukraynaya daha çox müttəfiq yardımına yönəldəcək.

Hazırda Vaşinqtonun Ukraynaya kömək etmək səyləri ikitərəfli dəstək alır, ictimai rəy sorğuları da ABŞ-ın davamlı yardımına güclü dəstəyin olduğunu göstərir. Bununla belə, ABŞ-dan mümkün yardımın azaldılması ilə bağlı bu təklif Qərb paytaxtlarında narahatlıq doğurur.

Britaniya parlamentinin müdafiə komitəsinin rəhbəri Tobias Ellvudun sözlərinə görə, Amerika silahlarının çoxluğu Ukraynanın döyüş meydanında üstünlük əldə etməsinə kömək edib. Bununla belə, istənilən ləngimə “oyun dəyişdiricisi” olacaq və Rusiyanın təşəbbüsü ələ almasına imkan verəcək.

“Amerika geri çəkilsə, Putin qələbəni elan edə bilər”, – Ellvud deyib.

Alman politoloq Ketrin Kulver-Eşbruk bildirib ki, ABŞ yardımının azaldılması, Avropanın bir çox ölkələri üçün həyəcan siqnalı ola bilər./teleqeaf.com