ABŞ Dövlət Departamenti Azərbaycanın işğaldan azad edilmiş ərazilərində dini abidələrin ermənilər tərəfindən dağıdılmasına dair məlumatlar paylaşıb.

Dövlət Departamentinin 2021-ci il üzrə Beynəlxalq Din Azadlığı hesabatında vətəndaş cəmiyyəti nümayəndələrinə, BMT-nin İnkişaf Proqramına və Azərbaycan hökumətinə istinadən məlumatlar paylaşılıb.

Bildirilir ki, işğaldan azad edilmiş ərazilərə səfər edən diplomatlar, vətəndaş cəmiyyəti nümayəndələri və jurnalistlərə görə ermənilərin nəzarətində olduğu dövr ərzində təxminən 400 min azərbaycanlıya məxsus çox sayda məscid, ziyarətgah, məzarlıq daxil olmaqla, yüzlərlə dini irs abidəsi qarət olunub, vandalizmə məruz qalıb, murdarlanıb və ya dağıdılıb.

Qeyd olunub ki, “REZA” adı ilə tanınan beynəlxalq fotojurnalist Reza Deqati Füzuli, Ağdam, Zəngəlan, Kəlbəcər və Cəbrayılda onlarla azərbaycanlılara məxsus qəbiristanlığın sistematik şəkildə dağıdılmasını sənədləşdirib:

“Məzarlar təhqir edilib, bəzi hallarda məzarları talan etmək üçün quyular qazılıb. Bəzi məzarların ağır texnikalar vasitəsilə eksqumasiya edilməsinə dair sübutlar aşkar olunub. Yalnız bir neçə məzar sistemli vandalizmə məruz qalmayıb. Amma məzar daşlarının əksəriyyəti çəkic və buna oxşar alətlərlə dağıdılıb. Bundan başqa, azərbaycanlıların məzarlarındakı qalıqlar eksqumasiya edilib, meyitlərin qızıl dişləri çıxarılıb. Nəticədə Azərbaycan qəbirstanlıqlarında kəllə və sümüklər səpələnib, bəzi hallarda isə qalıqlar məzardan tamamilə çıxarılıb”.

Deqatinin sözlərinə görə, erməni məzarları demək olar ki, toxunulmaz qalıb.

Hesabatda qeyd olunur ki, Azərbaycanın qaytardığı ərazilərin genişmiqyaslı minalanması nəticəsində qəsəbə və kəndlərdəki yüzlərlə dini yerlərin böyük əksəriyyətinə gediş-gəliş mümkünsüz olub. Bu dini obyektlərə vurulan zərərin məbləği uzun illər ərzində naməlum qala bilər. Füzuli rayonunda 19-cu əsrə aid Hacı Ələkbər Məscidinin dağıdılması, erməni dilində yazılarla vandalizmə məruz qoyulmuş və mehrabı güllələrlə dəlik-deşik edilmiş Ağdam Cümə məscidi dini abidələrə vurulan aşkarlanmış zərərlərin nümunələridir./report.az