Ermənistanda rəyi soruşulanların 45%-i ölkənin yanlış istiqamətdə getdiyini düşünür, 24%-i suala cavab verməkdə çətinlik çəkir və ya imtina edir. 31% ölkənin doğru yolda olduğunu hesab edir.

Bu rəqəmlər ABŞ Beynəlxalq Respublikaçılar İnstitutunun (IRI) sifarişi ilə “Breavis” kompaniyası tərəfindən keçirilən sorğu zamanı üzə çıxıb.

Sorğu 2021-ci il fevralın 8-dən 16-dək 1510 Ermənistan vətəndaşı arasında keçirilib.

Respondentlərin 33%-i seçkidə hakim siyasi qüvvəyə səs verməyə hazır olduqlarını bildiriblər. “Çiçəklənən Ermənistan” Partiyası ikinci yerdə (3%), Ermənistanın ikinci prezidenti Robert Köçəryan üçüncü yerdə dayanıb.

Respondentlərin yalnız 1%-i ölkənin üçüncü prezidenti Serj Sərkisyanın lideri olduğu Respublika Partiyasına, “Daşnaksütyun”a (Erməni İnqilabi Federasiyası), “İşıqlı Ermənistan”a və “Sasna Tsrer”ə səs verməyə hazır olduqlarını bildiriblər.

Rəyi soruşulanların 25%-i heç vaxt Respublika Partiyasına səs verməyəcəklərini bəyan ediblər. “Çiçəklənən Ermənistan” Partiyası üçün bu rəqəm 17%, “Mənim addımım” üçün 14%, “Daşnaksütyun” üçün 10%, “İşıqlı Ermənistan” üçün 8%, Robert Köçəryan üçün isə 1% təşkil edib.

Respondentlərin 42%-i heç bir siyasi qüvvəyə səs verməyəcəklərini, 12%-i cavab verməkdə çətinlik çəkdiklərini söyləyib. İrəvanda bu rəqəm müvafiq olaraq 50 və 13 faizdir.

Sorğuda iştirak edənlərin 28%-i iqtisadi vəziyyəti və işsizliyi əsas prioritet kimi göstərib. Yaşayış şərtləri ikinci yerdədir – bunu respondentlərin 8%-i qeyd edib. Sorğuda iştirak edənlərin yalnız 2%-i fiziki təhlükəsizliyi və ya hərbi hücum ehtimalını prioritet adlandırıb.

Respondentlərdən Ermənistanın qarşısında dayanan ən ciddi problemləri göstərmələri xahiş edildikdə cavablar aşağıdakı kimi olub:

Siyasi qeyri-sabitlik – 12%

İqtisadiyyat və işsizlik – 11%

Dağlıq Qarabağ məsələsi – 9%

Silahlı qüvvələrdə islahatlara ehtiyac – 8%

Hökumətin zıif işləməsi – 6%

“Əsirlər”in qaytarılması zərurəti – 6%

Ərazi və sərhəd məsələləri – 5%

Ermənistanın milli təhlükəsizliyi – 3% /teleqrqaf.com/