Asiyada Qarşılıqlı Fəaliyyət və Etimad Tədbirləri üzrə Müşavirənin (AQEM) üzv ölkələri arasında əməkdaşlıq ekosisteminin yaradılması regional inkişafın yeni üfüqlərini açacaq və daha inklüziv, rəqəmsal və dayanıqlı iqtisadi gələcəyin formalaşmasına kömək edəcək.
Bunu təşkilatın baş katibi Kayrat Sarıbay AQEM-in Bakıda keçirilən 10-cu biznes forumunda bildirib.
“Asiya böyük imkanlara malik regiondur. Buraya zəngin insan kapitalı, innovasiya potensialı və güclü iqtisadi baza daxildir. Bu gün burada toplaşaraq, müxtəlif ölkələri və sahələri təmsil edərək, regional əməkdaşlıq və dialoq vasitəsilə inklüziv artıma və dayanıqlı inkişafa olan ümumi sadiqliyimizi təsdiqləyirik. Dövlət qulluqçuları və diplomatlar çərçivələr formalaşdıra və dəstək təmin edə bilərlər. Lakin məhz sahibkarlar, investorlar və innovatorlar bizim nəhəng qitəmizin iqtisadi artımının və gələcək rifahının əsl hərəkətverici qüvvələridir”, – K.Sarıbay vurğulayıb.
O, həmçinin bildirib ki, forum çərçivəsində AQEM katibliyi Azərbaycanın və üzv dövlətlərin fəal dəstəyi ilə yeni layihə – “Asiyada KOS landşaftı: İnteraktiv rəhbərlik” adlı elektron kitab təqdim edəcək. Bu alət regionda kiçik və orta sahibkarlığın (KOS) inkişafına kömək etmək və məlumatlara çıxışı asanlaşdırmaq məqsədi daşıyır.
