İran Türkiyə və Azərbaycanın Ermənistana olan təzyiqini saxlayan yeganə ölkədir, lakin Donald Trampın ABŞ prezidentliyinə qayıtmasından sonra İran özü hücuma məruz qalacağı təqdirdə bu rolu yerinə yetirə bilməyəcək.

Bunu erməni mətbuatına açıqlamasında politoloq Artur Xaçikyan deyib.

Onun fikrincə, Trampın qayıdışı nəticəsində Zəngəzur dəhlizinin hətta hərbi yolla açılmasına cəhd edilə biləcəyi gözləniləndir. Xaçikyan əmindir ki, Azərbaycan Prezidenti “Ermənistanın bütün güzəştlərinə baxmayaraq”, öz siyasətindən əl çəkməyəcək: “Bunun fonunda Ermənistan hakimiyyəti güzəştə getməyə və bizi uçuruma aparmağa davam edir. Türkiyə və Azərbaycan lobbiləri Trampın yeni administrasiyası ilə çox fəal işləyirlər və bunun fonunda Ermənistanda belə işləri görə biləcək peşəkar kadrlar yoxdur. Bundan əlavə, diaspor nümayəndələri Ermənistanın Tramp üçün heç bir hərbi-strateji əhəmiyyətinin olmadığını bildirirlər. ABŞ-nin birinci müttəfiqi Azərbaycanla ittifaqda olan İsrail, ikincisi isə ABŞ-nin kürdləri təslim edəcəyi Türkiyədir”.

Onun fikrincə, Ermənistanın ABŞ ilə bu yaxınlarda imzaladığı sənədin heç bir əhəmiyyəti yoxdur. Bu sənəddə ABŞ-nin Ermənistanın təhlükəsizliyinin təmin edilməsi məsələsinə dair heç bir öhdəliyi yoxdur. Xaçikyan bunu yeni Sevr müqaviləsi adlandırıb. Bu sənədə görə Ermənistan Rusiya və İranla münasibətləri korlayacaq və artıq regionda dörd düşmən əldə edəcək. Politoloq etiraf edib ki, Ermənistan hakimiyyətinin siyasəti ölkədə enerji tariflərinin kəskin artmasına gətirib çıxara bilər. O, Ermənistanda aclığın başlaya biləcəyini də istisna etməyib və onun sözlərinə görə, Rusiya bu nəticələrlə bağlı xəbərdarlıq edib.

Artur Xaçikyanın fikrincə, Tramp ABŞ-ni Ukrayna münaqişəsindən çıxarmaq və resursları Yaxın Şərqə yönəltmək istəyir, çünki İsrailin müdafiəsi onun üçün xarici siyasətdə mütləq prioritetdir: “İran tam hücuma məruz qala bilər, ya da ABŞ Tehranı güzəştə getməyə və nüvə proqramını məhdudlaşdırmağa, həmçinin İranın nə Yəmən husilərinə, nə də “HƏMAS”-a kömək etməməsini təmin etmək üçün sərt tədbirlər görməyə cəhd edə bilər. Bütün bunlar baş verməsə, İrana qarşı hücum başlaya bilər. ABŞ-nin yeni administrasiyası hesab edir ki, indi İslam Respublikası ilə bağlı problemləri həll etməyin vaxtıdır. İsrail işğal siyasətini davam etdirmək üçün uzun illərdir bu fürsəti gözləyir. Düşünürəm ki, Qəzza zolağında, eləcə də “Hizbullah” qruplaşmasına qarşı hərbi əməliyyatlar bərpa olunacaq. İranın üzərində qara buludlar yığılır. Ya nüvə proqramını məhdudlaşdırmaqla güzəştə getməlidir, ya da hava hücumuna məruz qala bilər. Bu halda Tehran cavab verəcək ki, bu da gözlənilməz və təhlükəli eskalasiyaya gətirib çıxaracaq, o cümlədən bizim üçün”. /azpolitika.info