Ukraynada atəşkəs xeyirdən çox zərər verə bilər. İndiki şəraitdə belə bir barışıq yalnız Rusiya lideri Vladimir Putini həvəsləndirəcək, Ukraynanı zəiflədəcək və yeni hərbi əməliyyatlar üçün ilkin şərtlər olacaq.

“Blumberq” Qərbin daha yaxşı plana ehtiyacının olduğunu yazır.

Prezident Vladimir Zelenskinin qələbə planının təfərrüatları açıqlanmasa da, əsas ideyası aydındır: Putini danışıqlar masası arxasına oturmağa yalnız güclü Ukrayna məcbur edə bilər.

Nəşr bunun qismən doğru olduğunu bildirir. Nə qədər ki Putin Qərbin Ukraynaya dəstəyini davam etdirə biləcəyinə inanır, müharibə davam edəcək. Əsas sual onun strategiyasını necə dəyişdirməklə əlaqəlidir.

“Müharibə geosiyasi qeyri-sabitliyə səbəb olubvə dünya iqtisadiyyatını sarsıdıb. Münaqişəni bitirmək və Putinin şərtlərini qəbul etmək impulsu başadüşüləndir”, – məqalədə qeyd edilir.

“Blumberq” vurğulayır ki, Putin vaxtaşırı danışıqlara hazır olduğunu desə də, onun şərtləri, o cümlədən Ukraynaya ilhaq edilmiş 4 region və Krımdan, eləcə də NATO-ya üzvlükdən imtina etməsi tələbi bunu əksini göstərir. Rusiyanın bütün iqtisadiyyatı müharibəyə səfərbər olunub, Kreml müttəfiq ölkələrdən silah almağa davam edir. Nəşrə görə, Putinin məqsədi isə dəyişməz olaraq qalır: Ukraynanı tamamilə ələ keçirmək.

Atəşkəs Ukrayna üçün ciddi risklər yaradır. Döyüş əməliyyatlarında fasilə Rusiya ordusuna yeni qüvvələr cəlb etmək, itkiləri bərpa etmək, silah çatışmazlığını doldurmaq və taktiki çatışmazlıqları düzəltmək imkanı verəcək. Məqalədə vurğulanır ki, Putin bu fasilədən 2014-cü il işğalından sonra etdiyi kimi yeni hücumlara hazırlaşmaq üçün istifadə edəcək. Bu təhlükə atəşkəsin Ukraynaya beynəlxalq dəstəyi sarsıda biləcəyi faktı ilə daha da güclənir. Qərb müttəfiqləri artıq yardımı kəsmək üçün səbəb axtarırlar, Almaniya kimi bəziləri növbəti büdcədə ixtisarlar planlaşdırırlar. Atəşkəs onlara əlverişli bəhanə verə bilər.

Rusiya lideri Qərbin Ukraynanı dəstəkləməkdən yorulacağına ümid edir. Uğursuz atəşkəs bu gözləntiləri təsdiqləyə bilər. Mümkün atəşkəsdən sonra döyüşlərin bərpa edilməsi, Ukrayna və müttəfiqlərini daha pis vəziyyətə sala bilər.

“Blumberq” yazır ki, bunu nəzərə alaraq, Qərb mümkün danışıqlara başlamazdan əvvəl Kiyevə daha çox təsir rıçaqları qazanmağa kömək etməlidir.

Birincisi, Ukraynaya maliyyə və hərbi dəstəyi saxlamaq lazımdır. İndi yardımın kəsilməsi yalnız Putinin mövqeyini gücləndirəcək. Ukraynanın hava hücumundan müdafiəsini gücləndirmək, sursat təchizatını artırmaq və uzaqmənzilli raketlərin istifadəsinə qoyulan məhdudiyyətləri aradan qaldırmaq lazımdır. Yalnız bu miqyasda əlaqələndirilmiş səy Kremlin hesablamalarını dəyişə bilər.

İkincisi, müttəfiqlər Ukrayna üçün etibarlı təhlükəsizlik təminatları hazırlamalıdırlar. Bu, asan məsələ deyil, çünki NATO hələ alyansın üzvü olmayan dövlət qarşısında birbaşa öhdəliklər götürməyə hazır deyil. Bununla belə, hazırda Ukraynanın nəzarətində olan əraziləri müdafiə etmək üçün açıq və ya nəzərdə tutulan kollektiv vəd olmalıdır.

Həmçinin nəşr əlavə edir ki, hakimiyyəti boyunca Putin həmişə strateji üstünlük qazana biləcəyini görəndə razılaşmaları pozmağa hazır olub.