Teleqram messencerinin təsisçisi Pavel Durovun Parisdə saxlanması xarici investorların Fransaya olan inamını sarsıda bilər, lakin onların davranışı digər əsas bazar oyunçularının reaksiyasından asılı olacaq.

Bu fikri fransalı ekspert Jak Sapir səsləndirib.

“Belə bir addımın xarici investorları qorxutmayacağına gəlincə, məsələn, X-in rəhbəri İlon Maskın reaksiyasını izləməyə dəyər. Fransa Prezidenti Emmanuel Makron onu bir neçə dəfə qonaq edib, lakin Maskın sosial mediada açıq şəkildə Durovu dəstəklədiyi görünür. Yaxın həftələrdə onun davranışı potensial investorların münasibətinin göstəricisi ola bilər”, – ekspert hesab edir.

Onun fikrincə, Parisin “özbaşına hərəkətləri” digər böyük internet platformalarının rəhbərliyini ciddi narahat edə bilər, çünki Durov, medianın məlumatına görə, çox ciddi ittihamlarla üzləşir.

“İnzibati qaydaların pozulmasında ittiham olunmaq bir şeydir, iştirakçılıqda ittiham olunmaq başqa bir şeydir. Aydındır ki, bu, Fransanın nüfuzuna, xüsusən də onun siyasi reputasiyasına təsir edəcək, Fransanın Volter ölkəsi, söz azadlığı ölkəsi kimi imicinə tamamilə xələl gələcək”, – Sapir əlavə edib.

Xatırladaq ki, Teleqramın təsisçisi Pavel Durov Fransanın “Le Burje” hava limanında saxlanılıb. Durov bir sıra cinayətlərdə, o cümlədən terrorizm, narkotik qaçaqmalçılığı, fırıldaqçılıq, çirkli pulların yuyulması, oğurlanmış malların idarə edilməsində ittiham oluna bilər. Xatırladaq ki, 2021-ci ilin fevralında Durov Birləşmiş Ərəb Əmirlikləri vətəndaşlığını, avqustda isə Fransa vətəndaşlığını alıb.