Azərbaycan ictimai diplomatiyadan effektiv istifadə edərək, öz mədəniyyətini, tarixini və maraqlarını beynəlxalq aləmdə təbliğ edir və beynəlxalq ictimaiyyətdə müsbət imic formalaşdırır. İctimai diplomatiya bir ölkənin xarici ölkələrin vətəndaşları ilə birbaşa əlaqə quraraq, onların mədəniyyət, siyasət və ya digər maraqlarını anlamaq və bu yolla öz ölkəsinin imicini yaxşılaşdırmaq üçün aparılan diplomatik fəaliyyətlər toplusudur. Bu diplomatiya növü ənənəvi diplomatiyadan fərqli olaraq hökumətlər arasındakı münasibətlərdən çox, xalqlar və qeyri-hökumət təşkilatları arasındakı münasibətlərə fokuslanır.

İctimai diplomatiyanın məqsədi digər ölkələrin ictimaiyyətini məlumatlandırmaq, onlara təsir etmək və dostluq əlaqələri qurmaqdır. Bu fəaliyyətlərə media, mədəniyyət mübadiləsi, təhsil proqramları, beynəlxalq konfranslar, seminarlar və digər tədbirlər daxildir. İctimai diplomatiya vasitəsilə ölkələr öz dəyərlərini, mədəniyyətlərini və maraqlarını təbliğ edir, həmçinin, beynəlxalq ictimaiyyətdəki mövqelərini gücləndirir.

Azərbaycanın diaspor təşkilatları, dünya üzrə müxtəlif ölkələrdə Azərbaycan mədəniyyətini və tarixi həqiqətlərini təbliğ etməklə, Azərbaycanın imicini gücləndirmək üçün aktiv fəaliyyət göstərir. Diasporanın təşkil etdiyi tədbirlər, sərgilər, mədəni proqramlar və konfranslar Azərbaycan reallıqlarının xarici ictimaiyyətə çatdırılmasında mühüm rol oynayır.

2024-cü ilin 1-7 avqust tarixlərində, Azərbaycanın qədim torpağı Laçında, Diasporla İş üzrə Dövlət Komitəsi və Heydər Əliyev Fondunun birgə təşkilatçılığı ilə “Gənclər Yaşıl Dünya Naminə” Diaspor Gənclərinin V Yay Düşərgəsi keçirildi. Bu mühüm tədbir, dünyanın 60 ölkəsindən gələn 115 gənci, o cümlədən, azərbaycanlıları və ölkəmizə dost münasibət bəsləyən digər xalqların nümayəndələrini bir araya gətirdi.

Düşərgənin keçirildiyi Laçın rayonu tarixi və mədəni əhəmiyyəti ilə tanınır. Gənclər Laçının qədim abidələri və təbiəti ilə tanış olaraq, Azərbaycanın zəngin tarixi və mədəni irsi haqqında dərin biliklər əldə etdilər. Bu biliklər onların yaşadıqları ölkələrə dönərkən Azərbaycan haqqında doğru məlumatlar yaymalarına kömək edəcək.

Düşərgə iştirakçıları bir həftə ərzində müxtəlif fəaliyyətlərdə iştirak etdilər. Şəhid ailələrinin üzvləri və qəhrəman qazilərimizlə görüşlər, müxtəlif sahələr üzrə ekspertlərlə seminarlarda iştirak, tarixi və mədəni abidələrə ekskursiyalar, eləcə də, intellektual oyunlar və əyləncə proqramları düşərgənin əsas fəaliyyətləri idi. Bu tədbirlər gənclərə Azərbaycanın qəhrəmanlıq tarixini və mədəniyyətini daha yaxından tanıma imkanı verdi.

Azərbaycan ictimai diplomatiyanın əhəmiyyətindən istifadə edir

İctimai diplomatiya, Azərbaycan reallıqlarını dünyaya düzgün çatdırmaqda mühüm rol oynayır. Bu baxımdan, “Gənclər Yaşıl Dünya Naminə” Diaspor Gənclərinin V Yay Düşərgəsi, ölkəmizin beynəlxalq arenada düzgün tanınması və qəbul edilməsi üçün əhəmiyyətli bir platformadır. Diasporla İş üzrə Dövlət Komitəsi və Heydər Əliyev Fondunun bu cür tədbirləri təşkil etməsi Azərbaycanın beynəlxalq imicinin gücləndirilməsi və dünya miqyasında dostlarının sayının artırılması üçün vacibdir.

Düşərgədə iştirak edən Leypsiq Universitetində təhsil alan Nilüfər İbrahimi bildirib ki, 2020-ci ildə Bakıda orta məktəbi bitirdikdən sonra “Future Leaders Exchange Program” finalçısı kimi seçildim və Amerika Birləşmiş Ştatlarına yollanmaq şansı əldə edib.

“Diaspor komitəmiz tərəfindən Laçında təşkil olunan 5-ci Yay Düşərgəsi haqqında məlumat aldıqda, müraciət edib qoşulmaq üçün çox həyəcanlı idim. Komitə haqqında daha çox öyrənmək, dünyanın müxtəlif yerlərində yaşayan azərbaycanlı həmvətənlərimlə tanış olmaq və əlbəttə ki, azad edilmiş torpaqlarımızı ziyarət etmək istəyirdim. Bu günə qədər düşərgə çox maraqlı keçdi və son bir neçə gündə tariximiz haqqında çox şey öyrəndim.

Almaniyaya qayıtdıqdan sonra diasporla əməkdaşlıq etmək və Azərbaycanın tanıdılması üçün fəaliyyət göstərmək istəyirəm. Hər bir xaricdə yaşayan azərbaycanlıya növbəti yay düşərgələrinə qoşulmağı tövsiyə edirəm”.

Diasporla İş üzrə Dövlət Komitəsi, Azərbaycan reallıqlarının dünyaya çatdırılmasında vacib rol oynayır. Bu komitə, müxtəlif ölkələrdə yaşayan azərbaycanlıların birliyini və həmrəyliyini təmin edərək, onların Azərbaycanın milli maraqlarını qorumaqda fəal iştirak etmələrini təmin edir. Eyni zamanda, komitə müxtəlif ölkələrdə Azərbaycanla bağlı dəqiq və düzgün məlumatların yayılmasını təmin edir. Bu məqsədlə müxtəlif layihələr və tədbirlər həyata keçirilir ki, bunlardan biri də Diaspor Gənclərinin V Yay Düşərgəsidir.

Diasporla İş üzrə Dövlət Komitəsinin dəvəti ilə Avstraliyanın Sidney şəhərindən gəlmiş Azər Nəsirli isə təssüratlarını Trend-ə bölüşüb.

“Laçınımız çox gözəl şəhərdir, təbiəti, insanları hər biri çox gözəldir. Dövlətimiz və diaspora təşkilatı çox böyük əmək sərf edərək bizi buraya gətirir. Çox gözəl, maraqlı, yaddaqalan vaxt keçirdik. Azərbaycanımızı, Qarabağımızı, Laçınımızı bizə tanıdırlar. Çox şad oldum ki, Laçına gəldim, çox gözəl insanlar tanıdım, yeni dostlar qazandım. Sevinirəm ki, Qarabağımıza gəlmişəm, buranı görmüşəm. Avstraliyaya geri qayıdanda bu təcrübəmi oradakılarla da paylaşacağam”.

“Azərbaycanımızda hər şey çox gözəldir, çox gözəl təbiətimiz var. İnsanlarımız çox gözəldir, Bakımız çox gözəldir. Sözlər kifayət etmir ki, mən Azərbaycanım haqda oradakı dostlarıma, insanlara danışım. Burada çəkdiyim videoları, fotoları oraya gedəndə göstərəcəyəm və onlara Bakı, Qarabağ, Laçın haqqında məlumatlar verəcəyəm”, – deyə o qeyd edib.

Düşərgə gənclərin Azərbaycanın beynəlxalq əlaqələrindəki rolunu gücləndirmək məqsədi daşıyır. Gənclər burada əldə etdikləri bilik və təcrübələri öz ölkələrində tətbiq edərək, Azərbaycanın dostları və dəstəkçiləri olaraq fəaliyyət göstərirlər. Onlar Azərbaycanın mədəniyyəti, tarixi və reallıqları haqqında düzgün məlumatları yaymaqla, ölkəmizin beynəlxalq imicinin yaxşılaşdırılmasına töhfə verirlər.

“Gənclər Yaşıl Dünya Naminə” Diaspor Gənclərinin V Yay Düşərgəsi Azərbaycanın gənclər siyasətinin bir parçası olaraq, gənclərin beynəlxalq əlaqələrdə fəal iştirakını təmin etməklə yanaşı, onların şəxsi inkişafına da töhfə verir. Gənclər burada əldə etdikləri bilik və təcrübələri öz gələcək fəaliyyətlərində istifadə edərək, Azərbaycanın dostları və dəstəkçiləri olaraq fəaliyyət göstərirlər.

Bu cür tədbirlər, Azərbaycanın beynəlxalq arenada düzgün tanınması və qəbul edilməsi üçün vacibdir. Azərbaycan bu kimi tədbirlərlə beynəlxalq əlaqələrini gücləndirir və dünya miqyasında dostlarının sayını artırır. “Gənclər Yaşıl Dünya Naminə” Diaspor Gənclərinin V Yay Düşərgəsi bu məqsədlərə nail olmaq üçün atılan mühüm addımlardan biridir.

Ümumiyətlə isə Azərbaycan, beynəlxalq mədəni tədbirlərdə, festivallarda və sərgilərdə fəal iştirak edir. Məsələn, UNESCO ilə əməkdaşlıq çərçivəsində bir çox Azərbaycan mədəni irsi və abidələri dünya mirası siyahısına daxil edilib. Bu da Azərbaycanın mədəniyyətini dünyaya tanıdır və beynəlxalq aləmdə Azərbaycanın müsbət imicini formalaşdırır.

Azərbaycan müxtəlif ölkələrdən olan tələbələrə təqaüdlər təklif edir və bu tələbələr Azərbaycan universitetlərində təhsil alır. Həmçinin, Azərbaycan universitetləri beynəlxalq proqramlarda və mübadilə proqramlarında fəal iştirak edir. Bu, müxtəlif ölkələrdən olan gənclərin Azərbaycan haqqında məlumat əldə etməsinə və ölkələrarası əlaqələrin güclənməsinə töhfə verir.

Azərbaycan beynəlxalq konfranslar, sammitlər və idman tədbirləri təşkil etməklə, beynəlxalq ictimaiyyətin diqqətini cəlb edir. Məsələn, Bakı 2015 Avropa Oyunları, Formula 1 Qran-prisi və digər böyük tədbirlər Azərbaycanın beynəlxalq arenada tanınmasına kömək edir.

Azərbaycan müxtəlif ölkələrdə humanitar yardım və inkişaf layihələri həyata keçirir. Bu yardımlar və layihələr Azərbaycanın beynəlxalq ictimaiyyətdə məsuliyyətli bir ölkə kimi tanınmasına töhfə verir.