Vaşinqtonda keçiriləcək sammitdə NATO-nun Ukraynaya rəsmi dəvət və ya üzvlük üçün konkret yol təklif etmək planı yoxdur.

Bu barədə “The Hill” nəşri yazıb.

“Ukrayna Rusiya ilə müharibədə olduğu müddətdə üzvlük məsələsi qaldırılmayacaq. Çünki əks halda NATO da Rusiya ilə müharibə vəziyyətində qalacaq. Ukraynanın müharibə bitən kimi alyansa qoşula biləcəyi də şübhəlidir, çünki NATO-nun kollektiv müdafiə zəmanətinin Rusiyanı yeni hücumdan çəkindirəcəyinə inam yoxdur. Ukraynanın üzvlüyü ilə bağlı şübhələr təəccüblü olmamalıdır. NATO-nun çirkli sirri odur ki, soyuq müharibə bitəndən bəri təşkilat Rusiya təcavüzündən qorunmağa ehtiyacı olan ölkələri qəbul etmir”, – nəşr bildirib.

Nəşrin yazdığına görə, sonuncu qəbul edilən Finlandiya və İsveç də istisna deyil.

“Bu iki Skandinaviya dövləti güclü orduya və NATO ilə uzun əməkdaşlıq tarixinə malikdir. Digər yeni üzvlərdən fərqli olaraq, onlar NATO-ya daxil olduqdan sonra faktiki olaraq gücləniblər. NATO onları qorumaq əvəzinə, çox güman ki, digər müttəfiqlərin müdafiəsində kömək üçün onlara müraciət edəcək”, – məqalədə qeyd olunub.