Rafil Hüseynov Ağcabədini kimə tapşırıb?
Qusar Rayon İcra Hakimiyyətinin başçısı Şair Alxasov mayın 31-də, ardınca, iyunun 6-da Beyləqan rayon İcra Hakimiyyətinin başçısı Asif Ağayev vəzifələrindən azad edildilər. Açıqlanmasa da onların idarəetmədə yol verdikləri bir sıra nöqsanlara görə vəzifələrindən kənarlaşdırıldığı şübhəsizdir. İndi geniş ictimaiyyət işindən azad olunacaq növbəti İçra başçısını gözləyir. O, Ağcabədi rayon İcra Hakimiyyətinin başçısı Rafil Hüseynov ola bilərmi?
Sosial şəbəkələrdə və elektron mediada Ağcabədi rayonundan yayılan şikayətlərin çoxluğuna baxsaq, ola bilər. Rayon sakinləri hazırda İçra başçısı Rafil Hüseynovun baldızı oğlu Fikrət Allahverdiyevin əməllərindən narazılıq edirlər. Rafil Hüseynov 2019-cu ildə Ağcabədi rayon İcra Hakimiyyətinin başçısı vəzifəsinə təyin edildikdən cəmi bir il sonra qohumunu, baldızının oğlunu Ağcabədi rayon İcra Hakimiyyəti başçısının Ağcabədi şəhər İnzibati Ərazi Dairəsi üzrə nümayəndəsi təyin edib. Rayonda bir çox narazılıqlarda elə ondan sonra başlayıb.
Rayondan olan məlumatlı şəxslərin sözlərinə görə Fikrət Allahverdiyev Ağcabədi şəhərində hər yerdən pul toplamaqla məşguldur. Buraya şəhərdə yeni tikililərə icazələrin verilməsindən tutmuş, işə qəbula qədər hər şey daxildir. Fikrət Allahverdiyev Ağcabədi Kommunal Xidmət və Mənzil İstismar İdarəsinin rəisi Səfər Səfərovla əlbir olub, istismar idarəsinin işçilərinin hamısını dəyişib. Yeniləri də təbii ki, pul müqabilində işə götürüb. Məlumatlara görə Ağcabədi şəhərində aparılan abadlıq, təmir tikinti işlərinə də birbaşa İçra başçısının baldızı oğlu Fikrət Allahverdiyev nəzarət edir. O burada Rafil Hüseynovun gizlin işlərini həyata keçirir, yəni “qara kassa” rolunu oynayır.
Məlum olduğu kimi ölkəmizin hər yerində olduğu kimi Ağcabədi rayonunda da geniş miqyaslı abadlıq, quruculuq, yenidənqurma və yaşıllaşdırma işlərinə hər il milyonlarla manat dövlət vəsaiti ayrılır.
Aktualinfo.org Rafil Hüseynov Ağcabədiyə İcra başçısı təyin edildikdən sonra rayonda abadlıq, təmir- tikinti işlərinə ayrılmış dövlət vəsaitlər ətrafında kiçik bir araşdırma aparıb. Araşdırmalarda məlum oldu ki, Fikrət Allahverdiyevin idarəsində illik satınalma planlarına uyğun keçirilmiş tender prosedurlarında ciddi qanun pozuntularına yol verilib, habelə bağlanmış müqavilələrdə satın alınan xidmətlərin qiymətləri süni şəkildə şişirdilib. Rayonda ancaq abadlıq, təmir- tikinti işlərinə ayrılmış və şübhəli məqamlarla dolu olan satınalmaları diqqətinizə çatdırırıq.
Ağcabədi Şəhəri, İ. Qayıbov, N. Nərimanov, Ağcabədi-Zərdab Yolunun Girişində, Şəhidlər Xiyabanının Abadlıq və Təmir İşləri və Heydər Əliyev, Üzeyir Hacıbəyli prospektlərində, Xəlfələddin, H. Hacıyev və Nəsimi Küçələrində Bordyurların və Asfalt yolun rənglənməsi işləri üzrə “M-HOUSE CONSTRUCTİON” MMC ilə 442.482,7 manat məbləğində satınalma müqaviləsinin bağlanılması barədə məlumat dövlət satınalmalarının vahid internet portalıda 11.12.2023-cü ildə dərc edilib. Müqavilənin başlanma tarixi 24.11.2023-cü il, bitmə tarixi isə 31.12.2023-cü il göstərilib. Tender müsabiqəsi isə 15.06.2023-də elan olunub, zərflər paketinin açılışı isə 24.07.2023-cü ildə olub. Maraqlıdır tenderin nəticəsi nə üçün dekabrda dərc edilib? Digər maraqlı məsələ isə 36 günə bu işlərin görülməsidir. Bu mümkündürmü?
Ağcabədi şəhəri şəhər daxili avtomobil yollarının əsaslı təmiri işlərinin satınalınması üzrə “DREAM CONSTRUCTİON COMPANY” MMC ilə 543.395,56 manat məbləğində satınalma müqaviləsinin bağlanılması barədə məlumat 06.09.2023-cü ildə dərc edilib.
Dövlət Vergi Xidmətinin reyestr məlumatlarına əsasən, “Dream Construction Company” MMC 20 may 2014-cü ildə qeydiyyata alınıb. Nizamnamə kapitalı 5515 AZN olan şirkətin hüquqi ünvanı Bakı şəhəri Nizami rayonu, Heydər Əliyev prospekti, ev 152-də yerləşir. MMC-nin qanuni təmsilçisi İbrahimova Zəhra Musa qızıdır. Apardığımız
araşdırmaları zamanı məlum oldu ki, “Dream Construction Company” MMC əvvəllər “Otaxlı” MMC adı ilə fəaliyyət göstərib. 2022-ci ildə isə şirkətin adı dəyişdirilib. MMC-nin ilk qanuni təmsilçisi Hacıyev Mövlan Nəqşibəndi oğlu olub. Onu Abbasov Xıdır Pirverdi oğlu əvəzləyib. Xıdır Abbasovdan sonra isə şirkətin rəsmi təmsilçiliyi Zəhra İbrahimovaya keçib.
Ağcabədi şəhərində küçələrdə yolların cari təmiri (Hansı küçələrdəki yolların təmir olunacağı şərtlər toplusunda açıq göstərilmir) üzrə “FƏRİD” MMC ilə 547.556,4 manat məbləğində satınalma müqaviləsinin bağlanılması barədə məlumat 20.12.2022-cü ildə dərc edilib. Müqavilənin başlanma tarixi 05.12.2023-cü il, bitmə tarixi isə 31.12.2023-cü il göstərilib. Tender müsabiqəsi isə 01.09.2022-də elan olunub, zərflər paketinin açılışı isə 05.09.2022 -cü ildə olub. Təsəvvür edin yarın milyonluq tender müsabiqəsi 5 günə yekunlaşdırılıb. Tenderin nəticəsi isə nədənsə dekabrda dərc edilib və 25 gün ərzində Ağcabədidə hansı küçələr təmir olunub bəlli deyil.
“Ağcabədi şəhərində sairə abadlıq işlərinin” satın alınması üzrə “MƏXMƏR-77” MMC ilə 446.037,79 manat məbləğində satınalma müqaviləsinin bağlanılması barədə məlumat 22.07.2022-ci ildə dərc edilib.
Dövlət Vergi Xidmətinin reyestr məlumatlarına əsasən,”MƏXMƏR-77″ MMC 14.02.2012-ci ildə Dövlət Vergi Xidmətinin 8 saylı Ərazi Vergilər İdarəsində dövlət qeydiyyatına alınmış, nizamnamə kapitalı 10 manatdır. MMC-nin hüquqi ünvanı AĞCABƏDİ RAYONU, AĞCABƏDİ ŞƏHƏRİ, Ə.TALIBOV, ev 47, qanuni təmsilçisi isə Abdullayev Ramil Abdulla oğludur.
Ağcabədi şəhərinin bəzi küçələrində və yollarında əsaslı təmir işləri (Burada da hansı küçələrdəki yolların təmir olunacağı şərtlər toplusunda açıq göstərilmir) üzrə “FƏRİD” MMC ilə 545.199,54 manat məbləğində satınalma müqaviləsinin bağlanılması barədə məlumat 07.09.2021-ci ildə dərc edilib.
Açıq dövlət portalları üzərindən əldə etdiyimiz məlumatlara görə “FƏRİD” MMC 01.10.2001-ci ildə Dövlət Vergi Xidmətinin 8 saylı Ərazi Vergilər İdarəsində dövlət qeydiyyatına alınmış, nizamnamə kapitalı 10 manatdır. MMC-nin hüquqi ünvanı AĞCABƏDİ RAYONU, AĞCABƏDİ ŞƏHƏRİ, HƏZİ ASLANOV, ev 164-dir. Qanuni təmsilçisi isə Cəfərov Vidadi Bahatur oğlu olduğu göstərilir. MMC Ağcabədi şəhər İnzibati Ərazi Dairəsi üzrə Nümayəndəliyindən başqa heç bir dövlət sifarişi almayıb.
Abadlıq işlərinin satın alınması ( Şərtlər toplusunda abadlıq işlərinin harada aparılacağı açıq göstərilmir) üzrə “QARABAĞ İNŞAAT-2016” MMC ilə 271.706,09 manat məbləğində satınalma müqaviləsinin bağlanılması barədə məlumat 02.07.2021-ci ildə dərc edilib. Bu şirkətin qanuni təmsilçisi haqqında a.ağıda daha ətraflı məlumat verəcik.
Yolların əsaslı təmiri işlərinin satın alınması (Burada da hansı küçələrdəki yolların təmir olunacağı şərtlər toplusunda açıq göstərilmir) üzrə “FƏRİD” MMC ilə 529.844,87 manat məbləğində satınalma müqaviləsinin bağlanılması barədə məlumat 14.12.2020-ci ildə dərc edilib. Müqavilənin başlanma tarixi 07.12.2020-ci il, bitmə tarixi isə 30.12.2020-ci il göstərilib. Maraqlıdır cəmi 23 günə Ağcabədinin hansı yollarında təmir işləri aparılıb.
Abadlıq işlərinin satın alınması ( Şərtlər toplusunda abadlıq işlərinin harada aparılacağı açıq göstərilmir) üzrə “RCİ-İNKİŞAF 2014” MMC ilə 467.759,91 manat məbləğində bir satınalma müqaviləsinin bağlanılması barədə məlumat da 30.07.2020-ci ildə dərc edilib.
Dövlət Vergi Xidmətinin reyestr məlumatlarına əsasən, “RCİ-İNKİŞAF 2014” MMC 28.04.2014-cü ildə Dövlət Vergi Xidmətinin 8 saylı Ərazi Vergilər İdarəsində dövlət qeydiyyatına alınmış, nizamnamə kapitalı 10 manatdır. MMC-nin hüquqi ünvanı AĞCABƏDİ RAYONU, AĞCABƏDİ ŞƏHƏRİ, HEYDƏR .ƏLİYEV, qanuni təmsilçisinin isə Camalxanov Rövşən İbrahim oğlu olduğu göstərilir. Rövşən Camalxanov həm də “QARABAĞ İNŞAAT-2016” MMC-nin qanuni təmsilçisidir. Bu şirkətin hüquqi ünvanı isə AĞCABƏDİ RAYONU, AVŞAR kəndidir. Qeyd edək ki, Rövşən Camalxanovun həm də başqa bir neçə şirkəti var. Onun qanuni təmsilçisi olduğu “ELÇİN-TTQİ” MMC və “QARABAĞ İNŞAAT-2016” MMC 27.03.2019-cu il tarixdən 29.04.2019-cu il tarixə qədər, yəni bir ay ərzində Ağcabədi rayon İcra Hakimiyyəti tərəfindən elan edilmiş müxtəlif növ satınalmalarda 8 tenderin qalibi olub və ümumilikdə 240 875 manat dəyətində dövlət sifarişı alıb.
Göründüyü kimi 2020- 2023-cü illərdə Ağcabədi rayon İcra Hakimiyyəti başçısının Ağcabədi şəhər İnzibati Ərazi Dairəsi üzrə Nümayəndəliyi şəhərdə abadlıq işlərinin, yolların əsaslı təmiri işlərinin satınalmasına ümumi olaraq 3793978 (qəpikləri hesablamadan) manat məbləğində dövlət vəsaiti ayırıb.
Qeyd edək Ağcabədidə aparılan təmir tikinti işlərinə ayrılan dövlət vəsaitləri bunlarla bitmir. Ağcabədi rayon İcra Hakimiyyəti də bu məqsədlərlə dövlət vəsaiti ayırıb. Ağcabədi şəhəri H.Əliyev parkında, H.Əliyev prospektində və şəhərin digər küçə və prospektində abadlıq və təmir işlərinin satın alınması üzrə “M-HOUSE CONSTRUCTİON” MMC ilə 257.178,28 manat məbləğində satınalma müqaviləsinin bağlanılması barədə məlumat portalda 05.10.2023-cü ildə dərc edilib.
“Ağcabədi rayonunda 2022-ci il üçün abadlıq və cari təmir işləri” üzrə “MƏXMƏR-77” MMC ilə 192.105,78 manat məbləğində satınalma müqaviləsinin bağlanılması barədə məlumat portalda 13.10.2022-ci ildə dərc edilib.
Dövlət satınalmalarının vahid internet portalına yerləşdirilmiş bu məlumatlardan da göründüyü kimi, Ağcabədi şəhərində abadlıq, təmir-tikinti işlərinin aparılmasına son 4 ildə 4 milyon manatdan çox dövlət vəsaiti xərclənib. Amma rayondan olan məlumatlı şəxslərin sözlərinə görə şəhərdə nə abadlıq, nə də təmir-tikinti işlərinin aparılmasından əsər əlamət yoxdu. Bütün görülən işlər əsasən şəhərin mərkəzi hissəndə aparılıb və yüngülvarı, kosmetik işlər olub. Şəhərin ətraf hissələrində yollarda bərbad gündədi, küçələr də. Görsənən odur ki, Rafil Hüseynov Ağcabədini tapşırıb baldızı oğlu Fikrət Allahverdiyevə. Baldız oğlu da nə qədər fürsətdir Ağcabədidə istədiyini edir.
Aktualinfo.org