Ermənistanın baş naziri, ABŞ dövlət katibi və Avropa Komissiyasının rəhbərinin görüşü Ermənistanın Qərb oyunlarına qarışmasının mərhələlərindən biridir. Rusiya nəhayət nə baş verdiyini anladı.

Bunu Aİİ İnstitutunun direktoru, rusiyalı politoloq Vladimir Lepexin erməni mediasına müsahibəsində deyib.

Onun sözlərinə görə, Rusiyada uzun müddət Paşinyanın Qərbə doğru addımlarının təsadüf olduğunu düşünürdülər:

“İndi nəhayət başa düşürlər ki, İrana qarşı müharibəyə hazırlıq gedir. Ermənistan İrana qarşı müharibə üçün plasdarm olur. Bu görüşlər təhrikedici xarakter daşıyır. Avrointeqrasiya, NATO-nun müdafiəsi, Ermənistanın sivil dövlətlər ailəsinə qəbulu ilə bağlı vədlər verilir. Əslində Ermənistandan sadəcə olaraq Qərb qüvvələrinin maraqları üçün istifadə olunur”.

Onun fikrincə, Ermənistan bundan daxildə və Cənubi Qafqazda vəziyyətin əlavə destabilləşdirilməsindən başqa heç nə qazanmayacaq.

Lepexin hesab edir ki, İrana yaxınlaşmağın yeganə yolu Ermənistandan keçir:

“Bu görüş Qərbin Cənubi Qafqazda öz mövqelərini gücləndirmək baxımından və regionu İsraillə birlikdə öz geosiyasi maraqlarına uyğun nəzarət altına almaq üçün ardıcıl siyasi xətti çərçivəsində nəzərdən keçirməlidir”.

Ekspert Azərbaycan və Türkiyənin 2020-ci ildə ekspansiyasının Ermənistana qarşı deyil, daha çox Rusiyaya qarşı yönəldiyinə əminliyini də ifadə edib. O qeyd edib ki, son üç ildə Rusiya faktiki olaraq Cənubi Qafqazdan sıxışdırılıb və indi növbə İrandadır:

“Rusiyanın hələ Cənubi Qafqazla bağlı mövqeyi yoxdur və heç nə edə bilməz. Əgər Rusiyanın xarici siyasəti milli maraqların prioritetinə doğru dəyişərsə, o, Cənubi Qafqaza qayıtmağa cəhd edə bilər, amma indi yox”.

O vurğulayıb ki, Qərb hazırda bir neçə istiqamətdə, o cümlədən fələstinlilərin İsraildən təmizlənməsi ilə Böyük İsrail layihəsinin həyata keçirilməsi yolu ilə genişlənir:

“İkinci vəzifə İrana yaxınlaşmaq və onun təsirini minimuma endirmək üçün onu hərbi əməliyyatlara təhrik etmək və ola bilsin ki, bir faktor kimi İranı məhv etməkdir.

Rusiyaya gəldikdə isə ikinci mərhələyə keçid hazırlanır – Rusiya Federasiyasının NATO ilə, ola bilsin ki, Baltikyanı regionda, Polşada, Rumıniyada qarşıdurmaya cəlb edilməsi planlaşdırılır.

Cənubi Qafqaza gəlincə, prioritet vəzifə region ölkələrini İranla qarşıdurmaya cəlb etməkdir. NATO Ermənistan vasitəsilə regiona nüfuz etməli və İranı təxribata çəkməlidir.

Niyə Qərbin Ermənistanla əməkdaşlığa ehtiyacı var?

Ermənistandan istifadə olunacaq. Paşinyana və ətrafına pul, kredit, xarici ölkələrə səfərlər və bəzi təşkilatlarda iştirak vəd edilib. Lakin reallıqda söhbət Ermənistanın ardıcıl olaraq Qərbin müstəmləkəsinə çevrilməsindən gedir. Qərbin coğrafi mövqeyindən başqa Ermənistan nəyinə lazımdır? Bu coğrafi mövqe İrana hücum etmək üçün istifadə olunacaq.

Ermənistandan Qərb dövlətlərinin, ilk növbədə İngiltərənin maraqları üçün istifadə olunacaq. London 2018-ci ildə Ermənistanda dövlət çevrilişi təşkil edib, öz adamlarını ölkə başına qoyub və Ermənistanı get-gedə öz maraqlarının oyuncağına çevirir”./axar.az