“Bəzi qüvvələr inadla Türkiyəni Qəzzadakı müharibəyə cəlb etməyə, İsraillə toqquşdurmağa çalışır”.

Bunu şərhində politoloq, sabiq dövlət müşaviri Qabil Hüseynli deyib.

O qeyd edib ki, Türkiyənin Fələstin məsələsində mövqeyi hamıya məlumdur, lakin bir sıra qüvvələr Türkiyə və İsrail arasında silahlı qarşıdurma yaratmaq fikrindədirlər: “Bu qüvvələrin də başında İran durur. Coğrafiyamızdakı əksər radikal qrupların havadarı da elə İrandır. İran rəhbərliyi bölgədə vəziyyəti gərginləşdirərək kənardan baxmağa çalışır. Türkiyədə də bəzi qruplar vasitəsilə dövlətin siyasətinə təsir etmək cəhdləri görünür. Hətta aksiyalar da keçirilir, Türkiyə əsgərinin Qəzzaya göndərilməsi üçün çağırışlar edilir. Amma bu, çox təhlükəli çağırışdır. Tək Türkiyə üçün deyil, bütün türkdilli ölkələr üçün ciddi təhdidlər ola bilər. Türkiyə Avropa İttifaqına girməyə çalışır, İsraillə münasibətlər düzəlməyə başlamışdı… İndiki vəziyyətdə, məsələni maksimum dərəcədə diplomatik yolla həll etməyə çalışmaq lazımdır. Dini nüanslar siyasi xəttin önünə keçməməlidir”.

Q.Hüseynli vurğulayıb ki, HƏMAS-ın Qəzzadakı hökmranlığı Fələstinin gələcəyi üçün də təhdid daşıyır.

“2007-ci ildən bəri, Fələstində ikitirəlik hökm sürür. Hazırda Fələstinin iradəsini dünyada əks eksitdirən biri kimi məhz Mahmud Abbas və onun administrasiyası sayılır. Hesab edirəm ki, Qəzzanın gələcəyi üçün ən münasib variant bu bölgədə muxtariyyətin idarəsini təmin etməkdir. Əgər bu məsələ həllini tapsa, o zaman Fələstin dövlətinin yaranması üçün də şərtlər yaranmış olar”, – deyə politoloq əlavə edib./azpolitika.info