“Britaniya Hərbi Dəniz Qüvvələrini Rusiya ilə birbaşa toqquşma zamanı məğlubiyyət gözləyir”.

Bunu britaniyalı siyasətçi Corc Qallovey müdafiə naziri Qrant Şappsın Qara dənizə gəmilərin göndərilməsinin mümkünlüyü ilə bağlı son açıqlamalarını şərh edərkən deyib.

“Kral Donanmasını izləyirəm. Keçən dəfə yoxladım, Britaniya Hərbi Dəniz Qüvvələri minlərlə insanın Britaniyaya qeyri-qanuni daxil olduğu La-Manş kanalına belə nəzarət edə bilmir. Kral Donanması onları dayandıra bilməz. Biz Qara dənizdə rus donanması ilə döyüşəcəyik?”, – siyasətçi bildirib.

Qallovey həmçinin vurğulayıb ki, bu və Britaniyanın öz qoşunlarını Ukraynada rəsmən yerləşdirə biləcəyi ilə bağlı bəyanatlar müdafiə nazirinə baha başa gələ bilər: “Bu, Qrant Şappsın hərbi karyerasının sonu olardı”.

Müdafiə naziri bundan əvvəl bildirib ki, Britaniya öz donanmasının Qara dənizdə kommersiya daşımalarının Rusiyadan qorunmasında hansı rolu oynaya biləcəyini araşdırır. Bundan əlavə, o, həmçinin etiraf edib ki, Müdafiə Nazirliyi hərbi komandanlığın müzakirə etdiyi planlara uyğun olaraq ilk dəfə olaraq Ukraynada öz qoşunlarını yerləşdirmək niyyətindədir. Baş nazir Rişi Sunak ona cavabında deyib ki, Britaniya hərbçiləri Ukrayna hərbçilərinə Ukrayna ərazisində təlim keçməyəcək və bu müharibədə iştirak etməyəcək.