“Qarabağ ermənilərindən istifadə edərək Rusiyanı Ermənistandan sıxışdırıb çıxarmaq uğurlu həll yolu deyil”.

Bunu politoloq İlqar Vəlizadə deyib.

Ekspert ABŞ-ın bu siyasəti kontekstində bu ölkənin rəsmilərinin Azərbaycana ünvanladıqları mesajlara diqqət çəkib:

“ABŞ öz siyasətində anti-Rusiya kursunda Ermənistanla bərabər oynayacaq, deyəsən, bütün tərəflər çaş-başdır.

Dünən Senatda ermənipərəst lobbiçilərin təşkil etdiyi dinləmələrdə ABŞ dövlət katibinin Avropa və Avrasiya məsələləri üzrə köməkçisi Yura Kim Bakıdan “Laçın dəhlizinin dərhal açılması”nı və “ermənilərin hüquqlarının təmin edilməsi”ni tələb edib. O, “dağlıq qarabağ əhalisinə qarşı hər hansı formada zorakılığın yolverilməzliyi” barədə ifadələr işlətməklə yanaşı vurğuladı ki, ABŞ və Ermənistan arasındakı münasibətlər məhz onların görmək istədiyi istiqamətə dönməlidir, bu da Rusiya ilə yox, Vaşinqtonla tərəfdaşlıqdır.

“Buna nail olmaq üçün biz orada olmalıyıq. Ona görə də bizim tərəfdaşlığımızda Ermənistana yardımımız çox vacibdir”, – Kim vurğulayıb.

Yəni demək istəyir ki, siz Rusiyadan bir addım uzaqlaşırsınız, biz sizinlə görüşə doğru bir addım atırıq, o cümlədən Qarabağ məsələsində. Vəziyyət bir qədər 1988-ci ili xatırladır. O zaman “Qarabağ kartı” SSRİ-nin dağılması, indi Rusiyanın Ermənistandakı təsirini azaltmaq üçün tətik kimi istifadə olunurdu. Amma indi 1988-ci il deyil. ABŞ isə özünə bəlli olmayan nəticələri olan növbəti münaqişəni törətmək riski daşıyır.

“Hər şeyin ədalətə uyğun qurulduğu demokratik dünya” ilə bağlı illüziyalar çoxdan yox olub. Cəmiyyətlər yaxşı başa düşürlər ki, böyük oyunçuların hər hansı hərəkətinin arxasında öz maraqları dayanır. Qarabağ ermənilərindən istifadə edərək Rusiyanı Ermənistandan sıxışdırıb çıxarmaq uğurlu həll yolu deyil, bu, əks-effekt verə, ABŞ-ın regionda təsirinin azalmasına gətirib çıxara bilər. Bu, şübhəli mükafat üçün ağır nəticədir”.