Azərbaycanın Birləşmiş Millətlər Təşkilatı (BMT) yanında daimi nümayəndəsi Yaşar Əliyevin BMT Baş katibi Antoniu Quterreşə ünvanladığı növbəti məktubu Baş Assambleya və Təhlükəsizlik Şurasının sənədi kimi yayılıb.

səfir Yaşar Əliyevin BMT Baş katibi Antoniu Quterreşə ünvanladığı məktubda Ermənistanın BMT yanında daimi nümayəndəliyinin səsləndirdiyi qüsurlu və yalan iddialara qarşı fikirlər yer alıb: “Ermənistanın məqsədi bəllidir – Azərbaycana qarşı təcavüzə, ölkəmin suveren ərazilərinin otuz ildir işğalına, kütləvi vəhşiliklərə, nifrət cinayətlərinə və ört-basdır edilməmiş irqçilik siyasətinə görə öz məsuliyyətini gizlətməkdir. Ermənistanın Azərbaycanın 2020-ci ildə başlatdığı iddia edilən irimiqyaslı hərbi əməliyyatlarla bağlı təkrarlanan iddiaları tamamilə fantaziyadır. Azərbaycan BMT Nizamnaməsinə, beynəlxalq hüquqa və Təhlükəsizlik Şurasının 822 (1993), 853 (1993), 874 (1993) və 884 (1993) qətnamələrinə tam uyğun olaraq, öz ərazi bütövlüyünü bərpa etmək və xalqını qorumaq üçün yalnız öz suveren torpağında əks-hücuma keçib.

2022-ci ilin sentyabrında baş verən toqquşmalara gəlincə, onlar Ermənistan ərazisində deyil, delimitasiya olunmamış Azərbaycan-Ermənistan sərhədində baş verib və Ermənistan silahlı qüvvələri tərəfindən təxribat törədilib, bu barədə müvafiq qaydada sənədləşdirilib BMT-yə məlumat verilib”.

Sənəddə o da qeyd olunub ki, Ermənistanın Laçın-Xankəndi yolu ilə bağlı iddiaları da eyni dərəcədə yalandır: “10 noyabr 2020-ci il tarixində Üçtərəfli Bəyanat imzalandıqdan sonra Bəyanata uyğun olaraq, təhlükəsizliyə Azərbaycan zəmanət verməklə, yol boyu insanların, nəqliyyat vasitələrinin və yüklərin daşınması rejimi dəyişməz qalıb. Sakinlər, təcili yardım maşınları, humanitar yardım karvanları və Beynəlxalq Qırmızı Xaç Komitəsi yoldan məhdudiyyətsiz istifadə edib.

Bu dövr ərzində Ermənistan Laçın yolundan qeyri-qanuni hərbi məqsədlər üçün, o cümlədən silahlı qüvvələrin şəxsi heyətinin rotasiyası, əraziyə silahların ötürülməsi və minaların basdırılması, habelə faydalı qazıntıların qanunsuz dövriyyəsi üçün sui-istifadə edib.

Azərbaycan tərəfindən öz suveren ərazisində Laçın yolunun girişində sərhəd-keçid məntəqəsinin yaradılması dövlətlərin ərazi suverenliyi və bütövlüyünün əsas prinsiplərinə, öz sərhədlərinin qorunmasına və qanunun aliliyinə əsaslanaraq təhlükəsizliyini təmin etmək vəzifəsinə əsaslanır”.

Səfir bildirib ki, Ermənistan faktları təhrif etməklə, beynəlxalq sənədləri yanlış şərh edib: “Ermənistan beynəlxalq ictimaiyyəti çaşdırmaq, düşmənçilik və nifrətlə vaxt itirmək əvəzinə beynəlxalq öhdəliklərinə əməl etməli, öz silahlı qüvvələrini və qanunsuz silahlı birləşmələrini Azərbaycan ərazisindən tamamilə çıxarmalı, Azərbaycanın hələ də işğal altında olan səkkiz sərhəd kəndini qaytarılmalı, ərazi iddialarına, qeyri-qanuni fəaliyyətlərə və dezinformasiyaya, mina terroruna son qoymalı, münaqişə zamanı itkin düşmüş bir neçə min azərbaycanlının taleyinə işıq salmalı, Azərbaycana dəymiş zərərin ödənilməsi və iki dövlət arasında sülh müqaviləsi və sərhədin delimitasiyası üzrə danışıqlarda iştirak etməlidir”.

Beynəlxalq sənəddə qeyd olunur ki, Ermənistan tərəfindən yayılan yalanlara, təlqinlər və dezinformasiyalara baxmayraq, Azərbaycan münaqişədən zərər çəkmiş ərazilərinin reabilitasiyası, yenidənqurması və inteqrasiyası ilə yanaşı qaçqınların və məcburi köçkünlərin öz evlərinə təhlükəsiz şəkildə qayıtmasını təmin etmək, normallaşmanı sürətləndirmək əzmində qətidir./report.az