İsrailin hərbi kəşfiyyatının rəhbəri general-mayor Aharon Haliva İranın Qətərdə keçirilən futbol üzrə dünya çempionatına hücuma hazırlaşdığı barədə xəbərdarlıq edib.

Bu barədə “Tayms of İsrail” yazır.

A.Haliva qeyd edib ki, Tehranı ildırım hücumundan saxlayan yeganə şey dünya çempionatının ev sahiblərinin cavabıdır:

“Ümummilli etirazlar “vətəndaş üsyanına” çevrildiyi üçün İran siyasi rejimi böyük təzyiqlərlə üzləşib. Ölənlərin sayı, milli simvollara hücumlar, xüsusilə də sanksiyalar, mövcud beynəlxalq təzyiq və çətin iqtisadi vəziyyətlə birlikdə rejim üçün çox narahatlıq doğurur”.

İsrailli general hakimiyyətin ölkə daxilindəki vəziyyətdən çox narahat olduğunu və bunu siyasi nizamın mövcudluğuna təhlükə kimi qiymətləndirdiyini təklif edir. Lakin zabitin sözlərinə görə, hazırda rejimin süqutu ilə bağlı real təhlükə yoxdur.

“Ancaq İrana təzyiq artdıqca (Qərb ölkələrinin tətbiq etdiyi sanksiyalar nəzərdə tutulur), daxili təzyiqlər də daxil olmaqla, İranın cavabı daha aqressiv olur, ona görə də regionda və dünyada daha aqressiv cavablar gözləməliyik”, – Haliva dünya çempionatına mümkün hücumdan danışaraq xəbərdarlıq edib.

İsrailin müdafiə naziri Benni Qantz general-mayor Aharon Halivanın qənaətləri ilə razılaşıb və əlavə edib ki, Tehran regionda qeyri-sabitliyi genişləndirmək üçün imkanlar axtarır:

“Çox güman ki, dünya çempionatı qeyri-sabitlik yaratmağa çalışdığı yerlərdən biri olacaq”./publika.az