Konqres üzvləri ABŞ Prezidenti Cozef Bayden administrasiyasından Ukraynaya yardım üçün ayrılan vəsaitlərin xərclənməsi ilə bağlı ətraflı məlumat verməsini tələb edirlər. Hesabat olmadan, gələcəkdə Kiyevə potensial yardım paketləri qanunvericilərdən belə əhəmiyyətli dəstək görməyəcək.

Bu barədə “Politico” nəşri məlumat yayıb.

Məlumata görə, qanunverici orqan Ukraynaya 40 milyard dollarlıq yardım paketini təsdiq etməmişdən əvvəl də Pentaqon xərclərə nəzarət üçün Konqresin tələblərini yerinə yetirməkdə çətinlik çəkirdi. Beləliklə, Vaşinqtondakı Konqres Binasında Bayden administrasiyasının misli görünməmiş pul axını dalğasını düzgün hesablaya bilməyəcəyi və Ukraynaya göndərilən minlərlə ABŞ silahını izləyə bilməyəcəyi ilə bağlı artan narahatlıq var.

Bu səbəbdən qəzet qeyd edir ki, Demokratik və Respublikaçılar partiyalarının nümayəndələri göndərilən vəsaitlərə diqqətlə nəzarət etməyin zəruriliyini bəyan edirlər. Qanunvericilər artıq xəbərdarlıq edirlər ki, Kiyevə gələcək potensial yardım paketi Konqresdə böyük dəstəyi itirə bilər. Onlar ümid edirlər ki, Pentaqon onlara Kiyevə ayrılan vəsaitlərin xərclənməsi ilə bağlı bütün məlumatları verəcək.

Qəzet yazır ki, ABŞ administrasiyasının rəsmiləri Pentaqonun Ukraynaya verilən bütün silahları, o cümlədən çoxsaylı reaktiv yaylım atəşi sistemlərini izləmək və onlardan səmərəli istifadəni təmin etmək imkanından narahatdır. “Politico” Pentaqonun silahların istifadəsinə nəzarət etmək imkanının olmaması ilə bağlı narahatlıqlara diqqət çəkir.

Nəşrin yazdığına görə, ABŞ hakimiyyəti silahların Rusiyanın əlinə keçə biləcəyi qorxusunu nəzərə alaraq Ukraynaya qabaqcıl texnologiya göndərmək istəmir. “Əgər bu baş verərsə, Rusiya texnoloji sirləri açmaq üçün bu sistemlərin mühəndis analizini apara və öz silahlı qüvvələri üçün yeni silahlar yarada biləcək”.