Sosial sığorta, sosial sığorta ödənişləri ilə bağlı qanunvericiliyin daha da sadələşdirilməsi, təkmilləşdirilməsi istiqamətində bir sıra yeniliklər olcaq.

Bunu Əmək və Əhalinin Sosial Müdafiəsi Nazirliyinin tabeliyində Dövlət Sosial Müdafiə Fondunun Sosial Sığorta və Fərdi Uçot üzrə Mərkəzi Filialının direktoru Hüseyn Paşayev sosial şəbəkədəki “Sosial saat” adlı proqramında çıxışı zamanı deyib.

Onun sözlərinə görə, hazırda bu layihələr razılaşdırma mərhələsindədir:

“Yeniliklərin əhatəsi kifayət qədər genişdir. Bu yeniliklərin tətbiqinin məqsədlərindən biri sığortaedənlərin iş yükünün azaldılması, onlar üçün daha əlverişli imkanların yaradılması ilə bağlıdır. Bu, sığortaolunanlara göstərilən xidmətlərin daha da sürətləndirilməsinə, eyni zamanda biznes mühitinin yaxşılaşmasına gətirib çıxaracaq”.

H.Paşayev qeyd edib ki, 1 yanvar 2021-ci ildə anadan olan uşaqlar üçün müavinətlərin ödənilməsi artıq proaktiv qaydada həyata keçirilir:

“Bu o deməkdir ki, sığortaolunan heç bir yerə müraciət edib sənəd almayacaq, sığortaedən də portalın altsisteminə hansısa məlumatı daxil etməyəcək. Uşağın anadan olması ilə bağlı məlumat Ədliyyə Nazirliyinin müvafiq sistemində yaranandan sonra bizim nazirliyin mərkəzləşmiş sisteminə ötürülür və sistem bu müavinətin büdcə vəsaiti, yoxsa məcburi dövlət sosial sığorta üzrə verilməsini müəyyən edir. Daha sonra həmin ödəniş tərəfimizdən təmin edilir. 2021-ci ilin 9 ayında 40 minə yaxın yeni doğulan uşaq üçün müavinət proaktiv qaydada həyata keçirilib. Bu yenilik kifayət qədər sığortaediləni və sığortaedəni əlavə prosedurlardan azad edir. Artıq dəfnlə bağlı ödənişlərin də proaktiv qaydada həyata keçirilməsi ilə bağlı işlər aparılır. Bu işlərlə nazirliyin müvafiq şöbələri məşğuldur. Yaxın zamanda bu ödənişlərin də proaktiv qaydaya keçirilməsini təmin edəcəyik”.