Salyan rayon İcra Hakimiyyətinin başçısı Sevindik Hətəmovun barəsində bu günə qədər yazılanlara yeni nə isə əlavə etmək olmur. Çünki, rayonda kəndlərarası yollar yenə də bərbad vəziyyətdədir. Olunan şikayətlərə görə kəndlərdə demək olar ki, qaz yox dərəcəsindədir. Əsasən əkinçilik rayonu olduğundan sakinlər təsərrüfatlarını əkib, becərmək üçün suvarma suyndan istifadə edə bilmir. Bəs rayona başçısı təyin olunduqdan sonra Sevindik Hətəmovun rəhbərliyi altında nə kimi işlər görülüb, nə kimi yeniliklər olub? Bu barədə bundan bir neçə ay əvvəl biz oxuculara daha geniş məlumat vermişdik. Qeyd etmişdik ki, bir başçı kimi Sevindik Hətəmov rayonun abadlaşdırılmasına ayrılmış dövlət vəsaitlərini təmir-tikinti adı altında ona yaxınlığı ilə tanınan şirkətlər vasitəsi ilə mənimsəməklə məşğuldur. Bu günlərdə isə yazdıqlarımızın təsdiqini tapması barədə yeni məlumatlar əldə etmişik.

Aktualinfo.org xatırladır ki, Salyan rayonunda son illər keçirilən tenderlərlə bağlı şübhəli məqamlardan çox yazılıb. Buraya Salyan rayon İcra Hakimiyyəti və rayondakı digər qurumların elan etdiyi tender və kotirovkalar da daxildir. Elektron media resurslarında yayılan məlumatlarda Salyan rayonunda keçirilən tenderlərin çoxunda Hacı Qurban kimi tanınan iş adamının sahibi olduğu, “İlkin N” və “Sevinc 96” MMC-ləri qalib çıxdığı bildirilir.

Lakin Salyanda tenderlərdən çoxlu pul qazanan başqa bir şəxs də var imiş ki, rəsmi məlumatlarda adı çox hallanmır. Sözügedən şəxsin şirkətləri yoxdu. Əldə etdiyimiz məlumatlara görə bir fiziki şəxs kimi ancaq kotirovka sorğularında iştirak edir və demək olar Salyan rayonunda bütün idarələrin dəftərxana ləvazimatları və təsərrüfat malları üzrə keçirdikləri kotirovka sorğularının qalibi olur. Bu fiziki şəxs Baxışov Zahir Zabit oğludur. Düzdü  Zahir Baxışov bölgədə Hacı Qurban kimi məşhur deyil, amma onun da daxil olduğu çevrədədi. Təbii ki, çevrənin başında da Salyan rayon İcra Hakimiyyətinin başçısı Sevindik Hətəmov dayanır.

Dövlət satınalmalarının internet portalına yerləşdirilmiş məlumatlarda fiziki şəxs Baxışov Zahir Zabit oğlunun adı rəsmi olaraq yalnız bir dəfə Salyan Suvarma Sistemləri İdarəsi ilə 23.01.2018-ci il tarixdə dəftərxana ləvazimatları üzrə 6825 manat məbləğində satımalma müqaviləsinin bağlanılmasında keçir. Amma redaksiyamıza verilən bəzi məlumatlara görə Zahir Baxışov bir fiziki şəxs kimi Salyan rayonundakı bütün idarə, təşkilatların, tibb və təhsil müəssisələrinin formal keçirdikləri kotirovka sorğularının mütləq qalibi olur. Bu gizlin şəkildə keçirilən kotirovka sorğularında dəftərxana və təsərrüfat mallarının qiymətləri süni olaraq nə qədər şişirdilir deyə bilmərik. Amma redaksiyamıza verilən məlumatlara görə bu kimi yollarla Zahir Baxışovun hər il külli miqdarda dövlət vəsaitlərinin mənimsənilməsində iştirakçı olduğu bildirilir. Əlbəttə, Sevindik Hətəmovun ciddi nəzarəti altında.

Zahir Baxışovun oğlu Elsevər isə Salyanda “Bakı” restoranını işlədir. Deyilənlərə görə sözügedən restoran Salyanda çoxdan fəaliyyət göstərir. Salyandakı mənbələrin redaksiyamıza verdiyi məlumata görə restoran Zahir Baxışovun idarələr tərəfindən gizlin şəkildə keçirilən kotirovka sorğularından əldə etdiyi pullar hesabına tikilərək başa çatdırılıb. Yanında ona məxsus eyni adda avtoyuma məntəqəsi də fəaliyyət göstərir. Redaksiyamıza verilən məlumatlara görə buranın daimi qonaqları rayonun vəzifə sahiblərinin ərköyün övladlarıdı. Düzdü Salyanda komfort restoranların sayı çoxdur.  Amma burada hər axşam təşkil olunana kef məclislərinə görə çoxları buraya üstünlük verir. Hətta qonşu rayonlardan da bu məşhur restorana təşrif buyuran imkanlı şəxslər çox olur. Burada dövriyyəsi qanunla qadağan edilən malların belə istifadəsinə rahatlıqla yol verilir. Restoranda hər axşam baş verən hadisələrə isə sadəcə göz yumulur. Təbii ki, bunun da səbəbi restoranı işlədən Elsevər Baxışovun atasının vəzifəli şəxslərlə olan sıcaq dostluq münasibətləridir. Onlar da, bir deyil, iki deyil, çoxdur. Adları hallananların arasında rayonun hüquq mühafizə orqanlarının rəhbərləri ilə yanaşı İcra başçısı Sevindik Hətəmov da var.

Aktualinfo.org