Rusiya qoşunlarını Ukrayna sərhədinə daşıyarkən Çin Tayvanın hava sahəsini qətiyyətlə pozurdu. Pekin və Moskva regional böhranları eyni vaxtda gücləndirməyə razılaşırlar.

Bu sözləri alman siyasi ekspert Yoahim Kraus bildirib.

“Rusiya və Çin arasındakı bu uyğunluq hərbi mütəxəssislərin uzun müddətdir işarə etdikləri bir vəziyyəti ortaya çıxarır. Təhlükə budur ki, əməkdaşlıq edən Moskva və Pekin regional münaqişələri kobud şəkildə güclə həll etmək üçün öz bölgələrində eyni zamanda hərbi müdaxilələr etməyə cəhd göstərə bilər.

Rusiya və Çin yalnız qaydalara əsaslanan beynəlxalq nizama meydan oxumur, həm də bölgələrini özlərinə məxsus təsir və hökmranlıq sahəsi kimi qəbul edirlər. Və ABŞ əsas siyasi və hərbi düşmən hesab olunur. Moskva və Pekinin istədikləri bölgədə üstünlük təşkil etmələrini təmin edəcək hərbi və siyasi ittifaqa qoşulduqlarına dair çoxsaylı dəlillər var. ABŞ ilə böyük bir hərbi qarşıdurmadan çəkinirlər. Bunun əvəzinə regional münaqişələrdə sözdə “Salyami taktikası”nı (1944-1949-cu illərdə Şərqi Avropa ölkələrində Sovet tərəfdarı kommunist qüvvələrin hakimiyyətə addım-addım gəlməsi – red.) məhdud hərbi müdaxilə yolu ilə tədricən istədikləri nəticəyə gətirmək üçün istifadə etməyə çalışırlar. Bu cür müdaxilələr dolayısı ilə də, klassik istila şəklində də ola bilər”, – Y.Kraus qeyd edib./axar.az