Ombudsman Aparatının təklifi heç deputata da inandırıcı gəlmir

9 Mart 2021-ci ildə Azərbaycan ombudsmanı Səbinə Əliyeva bir uşağın saxlanması üçün məhkəmənin kəsdiyi alimentin ödənilməsini təmin edən bir mexanizmə çevrilməli olan Aliment Fondunun (AF) yaradılmasını təklif etdi. Xatırlatmaq istərdik ki, əvvəllər – 20 noyabr 2019-cu il tarixində belə bir təkliflə, Ailə, Qadın və Uşaq Problemləri üzrə Dövlət Komitəsinin (AQUPDK) o zamankı sədri Hicran Hüseynova çıxış etmişdi.

Komitəsi sədri bildirmişdi ki, dünya praktikasında aliment valideyn tərəfindən ödənilmirsə, məbləğ ailəyə Aliment Fondu tərəfindən ödənilir: “Bununla birlikdə, kişi bundan sonra Fonda verilən məbləğin iki qatını ödəyir. Buna görə Azərbaycanda da Aliment Fondunun yaradılması yaxşı olardı”.

Qeyd edək ki, bu gün kütləvi işsizlik şəraitində bir çox boşanan valideynlər sadəcə övladlarına aliment ödəyə bilmirlər. Ombudsman Aparatı onlardan pulları Aliment Fonduna qaytarmağı necə təmin edəcək?

Sualımıza cavab olaraq Ombudsman Aparatının nümayəndəsi Aydın Səfixanlı deyib ki, Mülki Prosessual Məcəllənin 234-cü maddəsinə əsasən, məhkəmə qərarı qanuni qüvvəyə mindikdən sonra icra edilir: “Bununla birlikdə, alimentlə bağlı məhkəmə qərarlarının icrası zamanı, ilk növbədə uşaqların əziyyət çəkməsi ilə sonuclanan problemlər tez-tez ortaya çıxır. Məhkəmə qərarı ilə aliment ödəməli olan bəzi valideynlər işsizdir”.

“Buna görə məhkəmə tərəfindən uşağın saxlanması üçün təyin olunan alimentin ödəniləcəyi Aliment Fondunun yaradılmasını təklif etdik. Sonra eyni məbləğ alimenti vaxtında ödəməyən şəxsdən alına bilər. Valideynin bir işi yoxdursa, ictimai işə cəlb oluna bilər və Aliment Fondunun xərclədiyi pul onun maaşından tutular”, – deyə Səfixanlı bildirib.

Qeyd etmək istərdik ki, DOST Mərkəzinin direktoru Niyazi Rəhimovun sözlərinə görə, ictimai işlərdə işləyənlərin əməkhaqqı səviyyəsi 203 manatdır. Maraqlıdır, Ombudsman Aparatı alimentin verilməsi üçün ayrılan pulu cəmi 203 manat maaşdan necə çıxacaq?

Bu suala Aydın Səfixanlının özündən cavab almağa çalışdıq. Lakin təəssüf ki, dəfələrlə onunla təkrar əlaqə saxlamaq cəhdlərimiz uğursuz oldu.

Milli Məclisin deputatı, iqtisadçı ekspert Vahid Əhmədov da inanmır ki, Aliment Fondunun yaradılması mövcud problemləri aradan qaldıra bilsin. “İctimai işlərdə çalışan və 203 manat alan bir şəxs Aliment Fonduna borclarını necə ödəyə bilər?!”,- deyə o, açıqlamasında bildirib.

Həm də xatırlatmaq istərdik ki, “2021-ci il üçün Azərbaycan Respublikasında yaşayış minimumu haqqında” qanununa görə, yaşayış minimumu 207 manat həcmində müəyyən edilib…/ayna.az/