Kazanda “Azadlıq” Tatar Gənclər İttifaqı olan Xocalı faciəsilə bağlı piket keçirib.

Bunu ittifaqın lideri Nail Nabiullin deyib.

Onun sözlərinə görə “Azadlıq” Tatar Gənclər İttifaqı bu piketlə qardaş Azərbaycan xalqına Xocalı soyqırımı qurbanlarının xatirəsinə həsr olunmuş anım günündə öz dəstəyini ifadə edib.

Nabiullin qeyd bildirib ki, “Azadlıq” hər zaman bütün türk xalqlarına dəstək olub:

“2012-ci ildən etibarən hər il Xocalı soyqırımı günündə tədbir keçiririk. Lakin ötən il qardaş Azərbaycan xalqına sərgilədiyimiz sadə insan həmrəyliyinə görə əlaqədar təzyiqlərlə qarşılaşdıq. Xüsusən də, “Türk baxışı” qəzetində işlətdiyim “Azərbaycan, bizim qəlbimiz səninlədir” ifadəsinə görə mənə sosial şəbəkələrdə və mediada sözün əsl mənasında təzyiqlər olundu. Lakin bütün təzyiqlərə baxmayaraq, biz öz mövqeyimizdən dönməyəcəyik”.

İttifaqın fəalı Fanil Gilyazov da bildirib ki, aksiyanın məqsədi faciənin günahsız qurbanlarının xatirəsini yad etmək və bu hadisəyə ictimai diqqət cəlb etməkdir:

“Cəmiyyət bundan ibrət dərsi götürməlidir və belə bir faciə bir daha heç vaxt və heç yerdə təkrar olunmamalıdır. Biz tatarlar türk dünyasının bir hissəsi kimi qardaş Azərbaycan xalqının dərdindən kənarda qala bilmərik”./axar.az/