“Azərbaycan sülhməramlıları yerinə otuzdurmalıdır” – Deputatdan açıqlama
Deputat Aqil Abbas: ” Niyə mən Kəlbəcərə Murovdan getməliyəm? Gül kimi Ağdərədən Kəlbəcərə 80 kilometrlik yol var?”
“Qarabağ ərazisində yerləşən Rusiya sülhməramlı qüvvələri öz səlahiyyətlərini çox aşırlar“.
Bunu Milli Məclisin Müdafiə, Təhlükəsizlik və Korrupsiya ilə mübarizə Komitəsinin üzvü Aqil Abbas “Turan” agentliyinə açıqlamasında bildirib.
Deputat qeyd edib ki, Azərbaycan həmin sülhməramlıları yerinə otuzdurmalıdır.
“Bildirilməlidir, sənin fəaliyyətin nədir, səlahiyyətin nədir. Üçtərəfli bəyanatda bu qeyd olunub. Yerinə yetirə bilmirsənsə, xoş getdin. Azərbaycan bu missiyanı pozmaq hüququ var və bəyanatda bu yazılıb»-deyə millət vəkili vurğulayıb.
A.Abbas bildirib ki, Rusiya sülhməramlıları bir neçə məsələdə öz səlahiyyətlərini aşırlar: «Birincisi, bu sülhməramlılar orada oturublar, yanında da o qondarma “Artsax”ın (Ermənistanda Dağlıq Qarabağa “Artsax” deyirlər) və Ermənistanın bayrağı var. Ermənistanın ya «Artsax”ın bayrağın mənim torpağımda nə işi var?”
Deputat hesab edir ki, o bayraq çıxarılmalıdır: “Orada yalnız Azərbaycan və sülhməramlı bayrağı ola bilər. İkincisi, ermənilər Laçın dəhliziilə Qafandan Əsgərana gəlirlər. Bir buna razılaşmışıq, keçə bilərlər. Onda mənə də icazə versinlər ki, məndə Ağdamdan 37 kilometrlik yolilə Şuşaya gedim. Niyə mən Şuşaya Füzulidən 105 kilometrlik yol ilə getməliyəm? Niyə mən Kəlbəcərə Murovdan getməliyəm? Gül kimi Ağdərədən Kəlbəcərə 80 kilometrlik yol var. Niyə mən ordan getməli deyiləm? Sən sülhməramlısansa, məni də qoru, mən oradan gedim».
Komitə üzvü vurğulayıb ki, Rusiya sülhməramlıları Ermənistan və ya separatçıların hərbçilərini ərazidən çıxarmalıdır: «Onların hərbçiləri orada ola bilməz. Rusiya sülhməramlıları onları oradan çıxarmalıdır. Azərbaycanda başqa ölkənin ordusu ola bilməz. Azərbaycan ərazisində bir ordu ola bilər, o da Azərbaycan ordusudur.
Ümumiyyətlə bütün Qarabağ ərazisində prokurorları Azərbaycanın Baş prokuroru təyin etməlidir, polisləri Azərbaycan Daxili İşlər Nazirliyinin polisləri olmalıdır. Belə olmalıdır və belə də olacaq. Bir az zamana ehtiyac var».
