Ermənistan Respublikası Ərazi İdarəetmə və İnfrastruktur nazirinin müavini Akop Vardanyanın rəhbərlik etdiyi nümayəndə heyəti Tehranda bir sıra görüşlər keçirib. Tərəflər enerji sahəsində əməkdaşlıq proqramı ilə bağlı müqavilələrdə dəyişiklik edilməsi məsələsini müzakirə ediblər.

Bu barədə Ermənistan mətbuatı məlumat yayıb. Məlumatda deyilir ki, Ermənistan nümayəndə heyəti dekabrın 26-da Tehranda bir sıra görüşlər keçirib. Səfər zamanı enerji məsələlərindən məsul olan Vardanyan İran neft nazirinin müavini Əmir Hüseyni Zamania ilə işçi məsləhətləşmələr aparıb və daha sonra İranın neft naziri Bizhan Namdar Zangane ilə görüşüb. Görüşlər zamanı tərəflər qaz, elektrik mübadiləsi proqramı ilə bağlı müqavilələrdə dəyişiklik məsələsini müzakirə ediblər.Tərəflər proqramı uzatmaq, tədarük olunan qaz və elektrik enerjisini artırmaq barədə razılığa gəliblər. Razılaşmalar təsdiqlənərsə, İran-Ermənistan qaz kəməri tam gücü ilə işləyəcək.

Ermənistan nümayəndə heyəti İran Enerji Nazirliyində də görüş keçirib. Nazir müavinləri – Akop Vardanyan və Homayun Haeri 3-cü yüksək gərginlikli elektrik ötürücü xəttinin inşasının son mərhələsinin təşkilati məsələlərini müzakirə ediblər. Qeyd edək ki, Ermənistan bir il ərzində İrandan bir neçə yüz (ümumiyyətlə, 400-500) milyon kubmetr qaz alır, bunun əvəzinə Ermənistan kubmetrinə 3 kilovat-saat elektrik enerjisi verir. Qaz İrəvana və qismən Razdan İES-ə verilir. Burada hər kubmetr qazdan 4-4,5 kWh elektrik enerjisi alınır. Beləliklə, bir neçə yüz milyon kilovat-saat artıqlıq Ermənistanın xeyrinə qalır.

Danışıqlar zamanı qeyd olunub ki, Ermənistana əlavə qaz tədarükü üçün imkanlar var (İran-Ermənistan qaz kəməri tam yüklənməkdən çox uzaqdır), lakin elektrik enerjisi nəql etmə qabiliyyəti məhdud olaraq qalır və tədarük həcmində ciddi bir artıma imkan vermir. Bunun üçün İranın vəsaiti ilə Ermənistanda yeni 400 kilovoltluq elektrik ötürücü xətt tikilir (hazırda ölkələr arasında 200 kV-lik iki xətt fəaliyyət göstərir). Barterə əlavə olaraq, Ermənistanda elektrik enerjisinin maya dəyərini azaltmağa kömək edəcək: yazda İrana hidroelektrik stansiyasından və Metsamor atom elektrik stansiyasından daha da ucuz enerji göndərmək və bunun müqabilində eyni miqdarda pul almaq mümkün olacaq. Bu, elektrik enerjisinin nisbətən daha bahalı olduğu Ermənistan istilik elektrik stansiyalarında istehsalın azalmasına səbəb olacaqdır./konkret,az/