“PALMALİ” Şirkətlər Qrupunun prezidenti Mübariz Mənsimov Azərbaycanın sabiq Milli Təhlükəsizlik naziri Eldar Mahmudovun atası, iqtisadçı alim Əhməd Mahmudovun da adını gəmiyə verib. 

Xatırladaq ki, 2007-ci ildə mayın 23-də “Palmali” şirkətlər qrupunun yaydığı məlumatda bu barədə bildirilir.

Həmin məlumatda qeyd olunur:

“Nijni Novqorod şəhərinin “Krasnoye Sormovo” gəmiqayırma zavodunda bu şirkətlər qrupunun sifarişi ilə inşa edilən gəminin suya salınma mərasimi keçirilib. Beş quru yük gəmisindən sonuncusu olan bu gəmi Azərbaycanın iqtisadçı alimi Əhməd Mahmudovun adını daşıyır.

Gəminin yüktutumu 6271 ton, uzunluğu 121,7 metr, eni 16,5 metr, göyərtəsinin hündürlüyü 6,2 metr, su altında qalan hissəsi 5,06 metrdir. Gəmi heyəti 14 nəfərdən ibarətdir. Odessa şəhərinin Gəmi Mühəndisliyi Bürosu tərəfindən hazırlanan layihə əsasında inşa edilən gəmi beynəlxalq konvensiyaların və ekoloji standartların bütün tələblərinə cavab verir. Büronun təqdim etdiyi layihəyə əsasən, gəmidə bir çox konstruktiv təkmilləşdirmələr tətbiq olunmuş və onun yük tutumu artırılıb.

Gəminin suya salınma mərasimində “Palmali” şirkətlər qrupunun prezidenti Mübariz Mənsimovun başçılıq etdiyi nümayəndə heyəti, Azərbaycan Respublikasının Rusiya Federasiyasındakı səfiri Polad Bülbüloğlu, Rusiyadakı Azərbaycan diaspor təşkilatlarının nümayəndələri, Əhməd Mahmudovun ailə üzvləri, Nijni Novqorod əyalətinin və Sormovo inzibati rayonunun rəhbərliyi, “Krasnoye Sormovo” zavodunun nümayəndələri iştirak ediblər.

Mərasimdə çıxış edən Əhməd Mahmudovun oğlu, Azərbaycan Respublikasının Milli Təhlükəsizlik naziri Eldar Mahmudov atasının xatirəsinə göstərilən ehtirama görə “PALMALİ” Şirkətlər Qrupunun prezidenti Mübariz Mənsimova ailə üzvləri adından minnətdarlığını bildirib.

Konsert proqramı ilə müşayiət olunan mərasimin sonunda dənizçi ənənəsinə uyğun olaraq Əhməd Mahmudovun qızı Elmira Mahmudova şampan şərabı şüşəsini gəminin göyərtəsinə çırpıb.

“PALMALİ” Şirkətlər Qrupu Aralıq, Baltik, Xəzər və Qara dəniz hövzələrində yük daşınmalarını həyata keçirir. Bununla yanaşı, şirkət Rusiyanın daxili sularında yük daşınmaları üzrə liderdir. Şirkətin donanması kirayə götürülmüş gəmilər də daxil olmaqla 120-dən artıq tanker və yük gəmisindən ibarətdir. “PALMALİ” əsasən neft məhsulları, xam neft, ərzaq və sənaye məhsullarının daşınması üzrə ixtisaslaşmışdır. Şirkətə məxsus quru yük gəmiləri isə bütün növ quru yüklərin daşınmasını həyata keçirir”.

Xatırladaq ki, şirkət bir neçə gün öncə Azərbaycan Xalq Cümhuriyyətinin qurucularından olan Məhəmməd Əmin Rəsulzadənin adının verildiyi gəmini suya buraxıb.(demokrat.az)